Ձեր վստահելի աղբյուրը

Նույնիսկ այն ժամանակ, երբ Բագրատ արքեպիսկոպոս Գալստանյանն իր հազարավոր հետևորդների հետ երթով սկսեց շարժվել դեպի Երևան, շատերը մտածում էին, թե ինչ կլինի մայիսի 9-ին, երբ նրանք հասնեն Հանրապետության հրապարակ, որտեղ գտնվում են վարչապետ Նիկոլ Փաշինյանի գրասենյակները։

Երևան ժամանելուց հետո Բագրատ Սրբազանը Փաշինյանին մեկ ժամ ժամանակ տվեց հրաժարական տալու համար: Երբ ժամը լրացավ, և նա հրաժարական չտվեց, Սրբազանը հայտարարեց, որ հաջորդ օրվանից ամբողջ երկրում սկսելու են քաղաքացիական անհնազանդության գործողություններ։ Նա հորդորեց իր հետևորդներին խաղաղ ակցիաներ անել և որևէ բռնություն չգործադրել։

Փաշինյանը հույս ուներ, որ ցուցարարների թիվը ժամանակի ընթացքում կնվազի, և շարժումը կմարի։ Վարչախումբն ամեն ինչ արեց Սրբազանին ու ցուցարարներին անարգելու և զրպարտելու համար։ Իշխանական քարոզիչները հայտարարեցին, որ մայիսի 9-ին Հանրապետության հրապարակում եղել է ընդամենը մոտ 20000 ցուցարար, մինչդեռ դիտորդների մեծ մասը բազմությունը գնահատել է մի քանի անգամ ավելի շատ: Վեց տարի շարունակ հազարավոր ստերով մոլորեցնելով հայ հասարակությանը՝ Փաշինյանը շարունակեց իր խաբուսիկ գործելաոճը՝ առանց որևէ ապացույցի պնդելով, որ ցուցարարները Կրեմլի գործակալներ են, որոնց գումար են վճարել այս ցույցերին մասնակցելու համար: Կառավարության ղեկավարները ծաղրում էին ոչ միայն Սրբազանին, այլև Հայոց եկեղեցին, որը հովվություն է արել ազգին 301 թվականից ի վեր, հատկապես հայկական պետականության բացակայության ժամանակ:

Ի հիասթափություն վարչապետի նվազող համակիրների, քանի որ նրա վարկանիշը վեց տարի առաջվա 80 տոկոսից նվազել է մինչև 8 տոկոս, Սրբազանը Հանրապետության հրապարակում անցկացրեց երկրորդ հանրահավաքը, որին ներկա էին տասնյակ հազարավոր հետևորդներ: Չնայած Փաշինյանի ոստիկանության բիրտ  գործողություններին, որոնք դաժանորեն հարձակվում էին խաղաղ ցուցարարների վրա, շարժումն ավելի մեծ թափ հավաքեց, քան թե մարեց։ Անցած շաբաթվա ընթացքում Սրբազանը հանդիպումներ ունեցավ իրավաբանների, բժիշկների, պաշտոնաթող զինվորականների, արվեստագետների և ընդդիմության տասնյակ առաջնորդների հետ։
Սրբազանն ապացուցեց Փաշինյանի հետևորդների կրկնվող մանտրայի կեղծ լինելը, թե վարչապետին ուրիշ ոչ ոք չի կարող փոխարինել։ Սրբազանին առաջին անգամ հաջողվեց իր գլխավորությամբ միավորել տարբեր ընդդիմադիր խմբավորումների։ Հանրության լայն  շերտերը, որոնք վրդովված էին Փաշինյանի պարտվողական զիջումներից Ադրբեջանին, խանդավառությամբ արձագանքեցին Սրբազանի խաղաղ, բայց հրատապ փոփոխությունների ուղերձին։

Վերջապես, մայիսի 26-ին տեղի ունեցավ Սրբազանի երկար սպասված մեծ հանրահավաքը, որի ընթացքում հնչեցին մի քանի կարևոր հայտարարություններ: Հավաքվածներին ասացին, որ Սրբազանը ժամանակավորապես կփոխարինի Փաշինյանին, որից հետո կոալիցիոն կառավարություն կձևավորվի, դրան կհաջորդեն խորհրդարանական ընտրություններ, որոնց արդյունքում նոր վարչապետ կընտրվի: Չնայած Սահմանադրությունը պահանջում է, որ վարչապետը նախորդող չորս տարիների ընթացքում լինի բացառապես Հայաստանի Հանրապետության քաղաքացի, Սրբազանի հետևորդները կարծում են, որ Հայաստանի և Կանադայի երկքաղաքացիությունը նրան չի խանգարի ժամանակավորապես վարչապետի պաշտոնը զբաղեցնել: Սրբազանը պարտավորվեց առաջնորդվել բացառապես իրավական պահանջներով: Զավեշտալի է, որ Փաշինյանի վարչախումբը, որը խախտել է գրեթե բոլոր գործող օրենքները, պահանջում է ցուցարարներից՝  պահպանել երկրի օրենքները:
Մայիսի 26-ի հանրահավաքում Սրբազանը նաև հայտարարեց, որ այլ բարձրաստիճան հոգևորականների և Գարեգին Բ կաթողիկոսի հետ խորհրդակցելուց հետո որոշվել է, որ ինքը կսառեցնի իր 30-ամյա հոգևոր ծառայությունը՝ քաղաքական գործունեությունն իր կրոնական կարգի հետ չհամատեղելու համար։

Սրբազանը փորձում է տապալել Փաշինյանին նույն կերպ, ինչպես վերջինս տապալեց վարչապետ Սերժ Սարգսյանին: Փաշինյանը և նրա հետևորդները իշխանության գալու համար խախտել են տասնյակ օրենքներ՝ արգելափակելով փողոցները, խորհրդարանի շենքը, դատարանները և կոտրելով Հայաստանի ռադիոտան փակ դռները: Սակայն Փաշինյանը կարծում է, որ միայն ինքը կարող է օրենքը խախտել: Զարմանալի է, որ նա նույնիսկ հպարտորեն հայտարարեց․ «Ինչի՞ էսօր Հայաստանում դատավոր կա, որ կարողա վարչապետի ասածը  չանի»։ Եթե մեկ ուրիշն անի այն, ինչ նա արեց, նրա բարբարոսական ոստիկանությանը հրամայված է, ինչպես ինքն էր հայտարարել 2021 թվականին մուրճը ձեռքին, խորհրդարանական քարոզարշավի ժամանակ՝ ջարդել իր հայ հակառակորդների գլուխները, թեև նա կեղծորեն հայտարարում է, որ ժողովրդավար է: Զարմանալիորեն, Փաշինյանը երբեք նման գռեհիկ բառապաշար չի օգտագործում ընդդեմ Հայաստանի իսկական թշնամիների՝ Ադրբեջանի եւ Թուրքիայի, որոնց ղեկավարներն  ամենավիրավորական հայտարարություններն են անում Հայաստանի մասին:

Մայիսի 26-ին Հանրապետության հրապարակում տեղի ունեցած զանգվածային հանրահավաքի ավարտին, Սրբազանն իր հետևորդների հետ երթով շարժվեց դեպի վարչապետի առանձնատուն և պահանջեց հանդիպել նրա հետ ու ասել, որ հրաժարական տա: Սակայն, պարզվեց, որ Փաշինյանը տանը չէ, մեկնել է Հայաստանի հյուսիսում ջրհեղեղից տուժած շրջաններ:
Այնուհետև Սրբազանը հավաքվածներին առաջնորդեց դեպի Հանրապետության հրապարակ, որտեղ մի քանի ժամ առաջ սկսվել էր հանրահավաքը։ Նա հորդորեց իր հետևորդներին քաղաքացիական անհնազանդության գործողություններ իրականացնել ողջ երկրում՝ Փաշինյանին ճնշելու համար, որպեսզի նա հրաժարական տա։

Սա Հայաստանի վերջին հնարավորությունն է փրկելու երկիրը պարտված և ապաշնորհ ղեկավարից՝ Փաշինյանից, որը պատրաստ է հետևել Ալիևի և Ադրբեջանի հրամաններին և գնալ անօրինական ու միակողմանի անվերջ զիջումների՝ մինչև Հայաստանի ամբողջական կորուստը՝ Արցախի կորստից հետո...

Հարութ Սասունյան
www.TheCaliforniaCourier.com
Թարգմանությունը՝ Ռուզաննա Ավագյանի