Ձեր վստահելի աղբյուրը

«Ցանկացած դեպք, այդ թվում այս դեպքը գտնվում է  նախարարության  հակակոռուպցիոն և ներքին  անվտանգության վարչության մոնիտորինգի ուշադրության կենտրոնում»,- ԱԺ-ում լրագրողների հետ զրույցում ասաց ՆԳ նախարարի տեղակալ Արփինե Սարգսյանին՝ պատասխանելով ոստիկանների կողմից Սարդարապատի հուշահամալիրում Ամենայն Հայոց Կաթողիկոսի և եկեղեցականների մուտքը խոչընդոտելու դեպքի վերաբերյալ հարցերին։

Նա վստահեցրեց, որ եթե գործընկերները փաստերի համադրման արդյունքում գտնեն, որ կա ծառայողական քննության կարիք, դա կլինի. «ՆԳՆ համար բռնության կամ լիազորությունների ոչ իրավաչափ անցման որևէ դեպք ընդունելի չէ»։

Փոխնախարարաը նշեց. «Կա պետական արարողակարգ, որով կան պահանջներ, որոնք պետք է պահպանվեն, այդ թվում խոսքը վերաբերում է  հրավիրվածներին։ Պետական արարողակարգի մեր գործընկերների  փոխանցմամբ,  տվյալ պահին իրականացվել են ճշգրտումներ, որովհետև ի սկզբանե  հրավիրյալների ցանկում չի եղել։ Դրանից  արդեն հարցը լուծվել է։
Պետական արարողակարգի շրջանակներում ոստիկանությունն ունի գործառույթներ, որոնք ենթադրում են աջակցում պետական արարողակարգի իրականացմանը, հետևապես այս պայմաններում գործել են ըստ արարողակարգի ընդհանուր պահանջների»։

Ա.Սարգսյանն այլ հարցերի չպատասխանեց այս թեմայով՝ նշելով, որ Նիկոլ Փաշինյանն արձագանքել է, ավելացնելու բան չունի։