Ձեր վստահելի աղբյուրը

Հայ Առաքելական Եկեղեցու Գուգարաց թեմը հայտարարություն է տարածել. 

«Մեծ ցավով տեղեկացանք մայիսի 28-ին՝ Հայաստանի Առաջին Հանրապետության անկախության ազգային տոնին, Սարդարապատի հուշահամալիրում տեղի ունեցած աննախադեպ խայտառակ իրողության մասին, երբ  իշխանությունների ապօրինի հրահանգով՝ ոստիկաններն անամոթաբար չէին թույլատրում Ամենայն Հայոց Հայրապետին և եկեղեցականաց դասին մուտք գործել հուշահամալիրի տարածք` աղոթելու մայիսյան հերոսամարտերում նահատակված քաջարի հայորդիների հոգիների հանգստության համար։ 

Մայիս 28-ը Հայոց պատմության փառապանծ էջերից է՝ հաղթանակի, արժանապատվության, հայրենատիրության և ազգապահպան առաքելության մասին, որից անմասն չի մնացել և խաչով ու զենքով իր կարևորագույն մասնակցությունն է ունեցել մեր Հայ Առաքելական Սուրբ Եկեղեցին:

Խստագույնս դատապարտում ենք ոստիկանական ուժերի նման ամբարտավան և  ապազգային վարքագիծը Հայոց Հայրապետի ու եկեղեցականների նկատմամբ և որդիական մեր զորակցությունն ենք հայտնում Նորին Սրբությանը:

Աղոթք ենք վերառաքում առ Աստված, որ Բարձրյալը ողջամտություն ու զգոնություն տա մեր հայոց ազգին:

Տեր Հովնան եպիսկոպոս Հակոբյան
Առաջնորդ Գուգարաց թեմի»։ 

Կոտայքի թեմը նույնպես դատապարատել է մայիսի 28-ին  ոստիկանների կողմից Սարդարապատի հուշահամալիրում Ամենայն Հայոց Կաթողիկոսի և եկեղեցականների մուտքը խոչընդոտելու դեպքը. 

«Ցավով անդրադառնում և  դատապարտում ենք  մայիսի 28֊ին Սարդարապատի հուշահամալիրում տեղի ունեցածը, երբ ոստիկանները փորձեցին խոչընդոտել և արգելել Ն.Ս.Օ.Տ.Տ. Ամենայն Հայոց Կաթողիկոսի և հոգևորականների այցը հուշահամալիր։

Անընդունելի ենք համարում  ցանկացած նման կեցվածք Վեհափառ Հայրապետի և հոգևոր դասի նկատմամբ ու աղոթում, որ Տերը ողջամտություն և զգաստություն պարգևի մեր ոստիկաններին»։