Ձեր վստահելի աղբյուրը

«Մեր հասարակությունը տեսնում է այդ ամեն ինչը։  Այդպիսի հրամաններ տվողներն ու կատարողները, վստահ եմ, իրենք ունեն անհամաչափ արտաքին աջակցություն, դրա համար էլ  անհամաչափ գործողությունների են դիմում»,-  դատական նիստից հետո լրագրողների հետ զրույցում ասաց ՀՀ երրորդ նախագահ Սերժ Սարգսյանը՝ պատասխանելով հարցերին, թե ինչպե՞ս է գնահատում ոստիկանների գործողությունները, որոնք փորձում են ուժի կիրառմամբ ճնշել «Տավուշը հանուն հայրենիքի» շարժումը։

Ինչ վերաբերում է  Վեհափառ Հայրապետի մուտքին խոչընդոտելուն, Սերժ Սարգսյանն ասաց, որ դա արդեն բոլոր իրավական նորմերից դուրս է, դուրս է նաև բարոյականության սահմաններից։

Արդյո՞ք «Տավուշը հանուն հայրենիքի» շարժումը կհասնի հաջողության հարցին ի պատասխան ՀՀ երրորդ նախագահն ասաց. «Եկեք չկանխատեսենք՝  հաջողություն կգրանցվի, թե չի գրանցվի, բայց մինչև այսօր պայքարն ընթանում է, չեմ կարծում, որ դեպի նվազում է գնում»։

Հարցին՝ ի՞նչն է կանխում այդ Շարժումը, Ս.Սարգսյանը պատասխանեց. «Բայց ենթադրենք հնարավոր չէ հիմա կանխել կամ նախկինում հնարավոր չէր կանխել, ապա ի՞նչ եք առաջարկում։ Դադարեցվի՞։ Ընդհանրապես չպայքարե՞նք։ Ես այլ ճանապարհ չեմ տեսնում։ Ակցիա անողները հնարավորություն չունեն ստորագրողների ձեռքից բռնելու։ Այդ ակցիաները նրա համար են, որպեսզի այդ ստորագրողներն այլևս այդ իրավունքը չունենան։ Այլ ճանապարհ կա՞։ Ես չեմ տեսնում այլ ճանապարհ»։

Լրագրողները հետաքրքրվեցին՝ արտաքին ուժեր ասելով ո՞ր երկրներին նկատի ունեի, Սերժ Սարգսյանը պատասխանեց. «Ակնհայտ է, որ առաջին հերթին նկատի ունեմ կոլեկտիվ արևմուտքին։ Տրադիցիոն, երբեք մեր դաշնակիցները կամ ոչ արևմտյան երկրները որևէ հայտարարություն մեր ներքին կյանքին վերաբերող գրեթե բացառում էին։ Եղել են տարբեր ժամանակներում տարբեր հայտարարություններ, բայց ոչ ուղիղ»։ 

Ինչ վերաբերում է Թուրքիայից ու Ադրբեջանից հնչող հայտարարություններին Շարժման վերաբերյալ, ՀՀ երրորդ նախագահն ասաց. «Թուրքիայի և Ադրբեջանի դիրքորոշումներն ինձ համար ոչինչ չեն նշանակում, նրանք այդ իրավունքն էլ չունեն։

Սերժ Սարգսյանը կրկին հայտարարեց, որ ՀՀԿ-ն, իրենց համակիրներն աջակցում են այն թեկնածուին, ում առաջադրել է Բագրատ Սրբազանը. «Ինքն ասել է ինքն է թեկնածուն, ուրեմն  մենք իրենք են աջակցում»։

Անդրադառնալով վ Բագրատ Սրբազանի երկքաղաքացիությանն ու նրա՝ վարչապետ դառնալու  Սահմանադրության արգելքին. «Այդպես չէ․ կա Սահմանադրական ելք և Սահմանադրությունը հնարավորություն է տալիս խորհրադարանի 2/3-ով փոխել այն կետը, որ արգելում է երկքաղաքացիներին ՀՀ-ում զբաղեցնել պաշտոններ։ Դա ելք է․ մի քիչ ավելի դժվար ելք է, քան պարզ անվստահություն հայտնելը, բայց դա էլ է ելք»։

Սերժ Սարգսյանը վստահ է, որ առանց արտաքին ուժերի աջակցության Շարժումը կարող է հաջողության հասնել։ Իսկ Շարժման հաղթանակի բանաձևը, ըստ ՀՀ երրորդ նախագահը, փողոցի ճնշումն է։ 

«Ես տեսնում եմ, որ Բագրատ Սրբազանը բավականին հաստատակամ է»,- ասաց ՀՀ երրորդ նախագահը։