Ձեր վստահելի աղբյուրը

«Նշեք մի հաջողություն, որ 2023 թվականի ընթացքում եք արձանագրել»,- ԱԺ արտաքին հարաբերությունների հանձնաժողովում 2023 թվականի բյուջեի կատարողականի քննարկման ժամանակ ասաց «Հայաստան» խմբակցության պատգամավոր Արթուր Խաչատրյանը՝ դիմելով ԱԳ նախարար Արարատ Միրզոյանին։

Միրզոյանն արձագանքեց, թե Խաչատրյանն ասում է արդյունք չկա, բայց ինքն ահագին ժամանակ հատկացրեց կոնկրետ արդյունքներ թվելով։

«Դուք նկատի ունեք միայն մեկ ուղղություն՝ Հայաստան-Ադրբեջան գործընթաց և Լեռնային Ղարաբաղ։ Այստեղ էլ չեմ խուսափում խոսակցությունից։

Ձեր մասնակցությամբ այնտեղ խորհրդարանը ծովից ծով Լեռնային Ղարաբաղի մասին  բանաձևեր էր ընդունում ու հռչակում, հենց մենք պայմանավորվում էինք ինչ-որ բանակցության մասին։ Հենց պայմանավորվում էինք ինչ-որ հանդիպում, ձեր մասնակցությամբ այնտեղ ջրվում էր այդ հանդիպումը։ Վերջում էլ՝ ամեն ինչ արցեիք, ջրեցիք, փչացրեք, հերիք չէր, ասացիք այս ղեկավարությունը հանձնողական է, հեղաշրջում արեցիք, բերեցիք ուրիշ ղեկավարության, երկու օրվա ընթացքում  լուծարեց այդ միավորը։

Մեղադրե՞լ եք ուզում։ Ուրեմն լավ իմացեք՝ ձեր անմիջական և ձեր ուժի անմիջական մասնակցությունն այդ արհավիրքի մեջ շատ հյութալի, ուժեղ, մարմնեղ, նյութական ու անշեղելի էր»,- ասաց Միրզոյանը։

Արթուր Խաչատրյանը հակադարձեց, որ թղթերը, համաձայնագրերը նյութականցված արդյունքի չեն հանգեցրել։

«Ասում եք դիտորդներ։ Եվրոպացիների հետ որ խոսում ես, ասում են՝ սա անվտանգային  առաքելություն չէ։

Հիշո՞ւմ եք՝ ձեր կառավարության ղեկավարը ոնց էր հիմնավորում ԵՄ դիտորդների մուտքը Հայաստանի սահմաններ, որովհետև Ադրբեջանը կարծում է՝ Հայաստանն ու Ռուսաստանը պատրաստվում են Ադրբեջանի վրա հարձակվեն, դրա համար եվրադիտորդներ ենք բերում։ Դա եվրոպացիներին պատմում ես, սկսում են ծիծաղել։

Հասկանում եք, չէ՞, որ դա սուտ է։

Մեր դիվանագիտությունը չի կարողացել Հայաստանի անվտանգային մակարդակը բարձրացնել։ Չկա այսօր մի պետություն, որ կասի՝ ես պատրաստ եմ երաշխավոր հանդիսանալ Հայաստանի և Ադրբեջանի միջև ձեռք բերված համաձայնությանը ու դա, ի դեպ, Ադրբեջանի պահանջն է»,- ասաց Արթուր Խաչատրյանը։

Նա նաև նշեց, որ Արցախում հեղաշրջում չի եղել, Արայիկ Հարությունյանը ձեռքերը լվացել ու մի կողմ էր քաշվել։

«Ձեր քաղաքական ղեկավարը հայտարարել էր՝ Արցախը թոկ է, «աշեյնիկ ու պավադոկ»։ Դե որ «աշեյնիկ ու պավադոկ» էր, պետք է կտրեիք։ Այսինքն պատերազմով կտրվեց թոկը, որը դուք ուզում էիք  կտրել։ Մնացածն ինչ ուզում եք ասել, լիրիկա է։ Ձեր քաղաքական թիմի պահանջը, քաղաքականությունը թոկը կտրել էր»։

Ի պատասխան Միրզոյանը ասաց․ «ԵՄ առաքելության տեղակայումից հետո, եթե հիշողությունս ինձ չի դավաճանում, որևէ մեծ հարձակում, ներխուժում Հայաստանի ինքնիշխան տարածք, չի եղել։ Սա փա՞ստ է։

Այն վիճակը, այն ծուղակը, որում հայտնվել է Հայաստանը, հայ  հանրությունը, դա մի ծուղակ է, որը դուք կամ ձեր օգնությամբ ուրիշները այդ թակարդը  լարել եք տասնամյակներ շարունակ։

Կարող է անձամբ դուք չեք էլ գիտակցում, որ դա ծուղակ էր։ Դա եղել է միջոց կանխելու Հայատանի իրական ինքնիշխանությունը, սուվերենությունն ու անկախությունը։ Այո, դա եղել է շատ քաղցր, բայց, այնուամենայնիվ, շղթա ապահովելու Հայաստանի անազատությունը»։

Ինչ վերաբերում է Թուրքիայի հետ հարաբերություններին, Ա.Միրզոյանն ասաց․ «Թուրքիայի կողմից պահանջներ չկան մեզ, կա շատ առողջ երկխոսություն, նաև պայմանավորվածություններ, որոնցից հիմնականները, ցավոք, առայժմ կյանքի չեն կոչվել՝ պայմանավորված այլ, երրորդ գործոններով։

Մեր ակնկալիքն է Թուրքիայից, որ մեր պայմանավորվածությունները կսկսեն իրականանալ, մենք պատրաստ ենք շարունակել այս շատ առողջ և նորմալ երկախոսությունը»։