Ձեր վստահելի աղբյուրը

ԱԺ արտաքին հարաբերությունների հանձնաժողովում 2023 թվականի բյուջեի կատարողականի քննարկման ժամանակ  ԱԳ նախարար Արարատ Միրզոյանը դիմեց ընդդիմությանը՝ ցանկանալով իմանալ, թե «վերադարձ Լեռնային Ղարաբաղ» ասելով ինչ պայմաններ են առաջարկում։

«Կարո՞ղ եք ասել, մանրամասնել՝ ինչ  նկատի ունենք ԼՂ վերադարձ ասելով, մասնավորապես  ի՞նչ պայմաններում ենք ուզում և որպես պատասխանատու քաղաքական ուժ առաջարկում, որ Լեռնային Ղարաբաղի հայերը վերադանան։

Արդյո՞ք դրանք այն պայմաններն են, որոնք առաջարկում է պաշտոնական Բաքուն։ Գիտեք նարատիվը` մեծ հաշվով նույն օրենքներ, նույն միջավայր, ինչպես մյուս տեղերում ապրող ադրբեջանցիների համար, թե՞ դա ինքնավարություն է Ադրբեջանի կազմում, թե՞ դա անկախ Լեռնային Ղարաբաղ է։ Դուք ի՞նչ եք ուզում։ Եթե դա անկախ ԼՂ է, կամ այն ստատուս քվոն է, որը կար 2019-ին։

Դուք հասկանո՞ւմ եք, որ դա և պատրա՞ստ եք արդյոք դա անել, օրինակ, առնվազն 4000 զոհի գնով։ Դուք առաջարկ արեք հանրությանը։ Մեզ քննադատում եք, լավ եք անում, բայց դուք առաջարկում եք պատերա՞զմ, թե՞ ինչպես ձեր հերթական  վարչապետի թեկնածուն ասում է՝ զինվորականները պետք է մեռնեն, դա էլ իրենց գործն է։ Շատ բառացի չէ, բայց մեծ հաշվով չեմ նենգափոխում իմաստը։ Դա էլ է մոտեցում։

Բայց  այդ դեպքում ոնց եք ասում,  հլը 4000-ը քիչ է, մի 1000 էլ ձեր կողմից եք ավելացնում,  5000 զոհ տվեցիք դուք դրա համար մեղավոր եք, կարո՞ղ եք կողմնորոշվել՝ հիմա պետք է զոհվել և տարածքներ գրավե՞լ, թե՞ պետք է չզոհվել ... չի բռնում, չեմ հասկանում առնվազն»։

«Հայաստան» խմբակցության քարտուղար Արծվիկ Մինասյանը նշեց, թե վերադարձը դիտարկում են միջազգային իրավունքին համապատասխան, որ որոշակի ինքնավարության աստիճան պետք է լինի, այլ ոչ թե ռազմական գործողություններով։

«Արցախի ժողովրդի ճակատագիրը դուք ինչպե՞ս եք պատկերացնում  որպես ԱԳ նախարար, որը մի քանի սուր ելույթներ ունեցավ միջազգային ամբիոններում և միջազգային ընկալման տեսակետից լավ էլ ընդունվում էր մինչև այն պահը, երբ Նիկոլ Փաշինյանը, ինչպես ինքն է ասում՝ քուանշեց ձեզ և դա էլ, ցավոք սրտի, միջազգային ամբիոններում օգտագործեցին մեր թշնամինները։

Արդյո՞ք դուք ունեք մեխանիզմ հնարավորություն այս հարցերը միջազգային ասպարեզում պահելու համար»։

Ի պատասխան, Արարատ Միրզոյանը ասաց. «Ասում եք Լեռնային Ղարաբաղի ինքնավարություն, հրաշալի է բացի նրանից, որ դուք դա հիմա ասում եք այն պահին և այն պայմաններում, երբ Լեռնային Ղարաբաղում այլևս հայ չկա։

Երբ որ ԼՂ-ում հայեր կային, և մենք առաջարկում էինք իջեցնել նշաձողը անկախությունից և խոսել այդ տեսակ հարցերի մասին, մեզ ասում էին դավաճան, թրքաբարո, թուրք, պիղծ։ Եթե մենք ամեն անգամ  վերցնում ենք նույն բառամթերքը, նույն գործիքը, գնում, հագնում ենք պատի, կարո՞ղ է ինչ-որ մի բան սխալ ենք անում։ Բաներ կան, որ դուք էլ եք ուշ հասկանում, մենակ մեզ եք մեղադրում չհասկանալու մեջ, բա դուք ինչի՞ չէիք շուտ հասկանում, որ կարելի է ինքնավարություն ասել։

Թող իմ հարցը մնա օդում կախված, էլի կշփվենք, եթե թուրքական էլիտար զորքեր չբերենք ձեզ ձերբակալելու»։