Ձեր վստահելի աղբյուրը

ԱԺ «Հայաստան» խմբակցության պատգամավոր Գառնիկ Դանիելյանը խորին շնորհակալություն հայտնեց Սոթքի բնակիչներին՝ ջերմ ու լավ դիմավորելու համար։ Այնուհետև ներկայացրեց, որ «Տավուշը հանուն Հայրենիքի» շարժումը ստեղծվել է Տավուշում՝ Սրբազան հոր առաջնորդությամբ։

«Այն արհավիրքները, որոնք կան Տավուշում, ձեզ քաջածանոթ են։ Այս իշխանությունների վարած հակահայ քաղաքականության արդյունքում Գեղարքունիքի մարզը դարձել է սահմանապահ, սահմանամերձ մարզ։ Այն ինչ կատարվում է Տավուշում, երբ թշնամին եկել և մեր գյուղերի մեձակայքում հաստատվել է և այսօր Կիրանց գյուղը կիսվել է երկու մասին, դուք ծանոթ եք այս ողջ ընթացքի արհավիրքին, դժբախտություններին ու դժվարություններին»,- ասաց պատգամավորը։

Դանիելյանը շեշտեց, որ այս իշխանություններն ունակ չեն պաշտպանելու ո՛չ տավուշցու և ո՛չ էլ  Գեղարքունիքի մարզի բնակչի անվտանգությունը։

«Նրանք մի բան գիտեն՝ մեզանից ինչ կուզի թշնամին, մենք հլու ու հնազանդ պետք է կատարենք բոլոր  պահանջները։ Որևէ մի կետ, սահման չկա, որտեղ կավարտվեն Ադրբեջանի պահանջները և չկա մի կետ, երբ այս իշխանությունները կասեն՝ սա մեր կարմիր գիծն է և մեր հողից տալու ոչ մի բան չունենք»,- ասաց նա։
 

Հիշեցնենք, որ այս պահին Գեղարքունիքի մարզի Սոթք բնակավայրում տեղի է ունենում «Տավուշը հանուն Հայրենիքի» շարժման հանրահավաքը։