Ձեր վստահելի աղբյուրը

«Ողջունում եմ շարժումը, քանի որ պայքար է ՝ ընդդեմ թույլ իշխանությունների, որոնք պատրաստ են զիջումների գնալ՝ իրենց աթոռները պահելու համար  և ոչ թե՝ հայրենիքը։ Չեն գնահատում մեր այդքան զոհերը և պատրաստ են նոր զիջումների, որոնց ամեն ձև ականատեսն ենք լինում։ Մենք չենք տեսնում փոխզիջում, որի արդյունքում մեր սեփական հողերից պետք է հետ քաշվեին»,- Սոթքում տեղի ունեցած հանրահավաքից հետո ասաց  Գեղամասար խոշորացված համայնքի նախկին ղեկավար Հակոբ Ավետյանը։

Ավետյանի խոսքով՝ պայքարը ոչ միայն արտաքին թշնամիների դեմ է, այլ ավելի շատ խանգարում է թույլ ղեկավարությունը։

Անդրադառնալով հարցին, թե հնարավոր համարում է ադրբեջանական զորքերի դուրս բերումը մեր տարածքից, ինչի մասին հայտարարել է Գեղարքունիքի մարզպետը, Ավետյանն ասաց․ «Ոչ, հերքում եմ, չի կարող նման բան լինել։ Ես այս կառավարության մեջ չեմ տեսնում այդ պայքարը կամ նպատակները»։

Ինչ վերաբերում է Սարդարապատում Ամենայն Հայոց Կաթողիկոսի հետ տեղի ունեցած դեպքին, ապա Ավետյանը կատարվածը որակեց թուրքական ծրագիր։ «Դարերով պայքարել են մեր եկեղեցին, կրոնը տապալելու համար, բայց մեր ազգը կարողացել է պահպանել, իսկ հիմա Կաթողիկոսին արգելելն անմիջապես թուրքի ծրագիր է։ Սրբապղծություն եմ համարում ուժային կառույցների՝ նման հրամանին ենթարկվելը։ Այդ հրամանատարական կազմին կարելի է պարգևատրել «Թալիաթ փաշա» մեդալով»։