Ձեր վստահելի աղբյուրը

Օրեր առաջ Ազգայն ժողովում ԿԳՄՍ նախարար Ժաննա Անդրեասյանը  «Հայոց պատմության» 7-րդ դասարանի դասագիրքը քննադատող, իր խոսքով ասած, «բոլոր հայտնի, անհայտ  պատմաբաններին» մեղադրել էր, որ եթե այդքան կարևորում են դասագիրքը, ինչու իրենք չեն գրում ու ներկայացնում մրցույթի։

«Այդքան խոսում են, կարևորում են, ո՞ւր են իրենց գրած գրքերը, ինչո՞ւ ենք մենք էլի «Պատմություն» առարկայի դասագրքի մրցույթ հայտարարում ու մնում նույն վիճակում»,- մասնավորապես ասել էր Անդրեասյանը։

Panorama.am-ը պատմական գիտությունների դոկտոր, պրոֆեսոր, «Պատմություն և մշակույթ» հայագիտական հանդեսի գլխավոր խմբագիր, ԵՊՀ Պատմության ֆակուլտետի Հայոց պատմության ամբիոնի վարիչ  Էդիկ Մինասյանից, ով նույնպես դասագրքերի, մենագրությունների, գրքերի հեղինակ է, հետաքրքրեց, թե ինչո՞ւ չի մասնակցում դպրոցական դասագրքերի համար հայտարարված մրցույթին։

Էդիկ Մինասյան-Մենք ինչու չենք գրել դասագիրք. նախ և առաջ հանրակրթության պետական նոր չափորոշիչներն անընդունելի են մեզ համար։ Վիճահարույց հարցեր կան, որոնք մենք չենք ընդունում։ Մեր կազմած նախկին դասագրքերը նորմալ չափանիշներով էին, իսկ այս նոր չափորոշիչները չէին համապատասխանում մեր ընկալումներին, դրա համար էլ հրաժարվեցինք։ Տեսանք, թե ինչ եղավ «Հայոց պատմության» 7-րդ դասարանի դասագրքի հետ կապված, որը նոր չափորոշչով էր կազմված։

Մենք նախապատրաստվում ենք մասնակցել  ավագ դպրոցի դասագրքերի մրցույթներին։ Կարծում եմ՝ կավարտենք ու կմասնակցենք հաջորդ մրցույթին, ավագ դպրոցի դեպքում մոտեցումները, սկզբունքները մի քիչ այլ են։ Դեռ վեջնական չենք որոշել, բայց մտածում ենք՝ կարելի է ու կաշխատենք այդ ուղղությամբ։  Այնպես չէ, որ լրիվ հրաժարվել ենք դասագիրք գրելուց։ Կմասնակցենք։

7-րդ, 8-րդ, 9-րդ դասարանների դասագրքերը գրելու չափորոշիչների հետ կապված  մեր, նաև Գիտությունների ազգային ակադեմիայի Պատմության ինստիտուտի, Մանկավարաժան համալսարանի կողմից ներկայացված առարկությունները, դիտողությունները, հաշվի չեն առել։ Ասացին՝ կփոխենք, բայց իրականում չի փոխվել ու առաջնորդվել են իրենց  մշակած չափորոշիչներով։

Կրկնում եմ՝ այս նոր չափորոշիչներով մենք չէինք կարող գրել դասագիրք, հենց այդ պատճառով էլ հրաժարվել ենք մասնակցել մրցույթներին։ 

Panorama.am-Որպես պատմաբան՝ ի՞նչ կարծիք ունեք այսօր Բագրատ արեքպիսկոպոս Գալստանյանի առաջնորդած շարժման մասին և պատմության ո՞ր ժամանակաշրջանի հետ կհամեմատեք այսօրվա վիճակը։

Էդիկ Մինասյան- Շարժումը դրական երևույթ է, քանի որ ամեն մի շարժում փոփոխությունների, նոր երևույթների, լավագույն ապագայի  ակնկալիքով է, հատկապես, որ առաջնորդվում է հանդուրժողականության, համերաշխության կոչերով։

Պատմության մեջ որոշակի ժամանակահատվածում ազգային վերածնունդի շրջանները կրկվում են։

Panorama.am-Իսկ ի՞նչ կասեք եկեղեցի-իշխանություն հակասությունների, հակադրությունների մասին։

Էդիկ Մինասյան- Այդ հակասությունը, հակադրությունը ճիշտ չէ։ Եկեղեցին հասարակության բարոմետրն է, շարժման կարևոր օղակը։ Այն քննադատությունները, երևույթները, որ եկեղեցին չպետք է մասնակցի, ճիշտ չէ, հոգևորականը հասարակության մի մասն է։

Եկեղեցին համերաշխության, միասնության քարոզողն է։ Պատմության մեջ եղել են շրջաններ, երբ պետականության բացակայության պայմաններում եկեղեցին ինքն է որոշակի դերակատարում ունեցել։

Սեպտեմբերին մենք գիտական կոնֆերանս ենք ունենալու «Հայոց եկեղեցու դերը պետականության բացակայության պայմաններում» թեմայով։ Պատմության ընթացքում հաճախ է եկեղեցին փոխարինել պետությանը ու կարողացել է պահպանել ազգի գոյությունը։ Սփյուռքում էլ եկեղեցին մեծ դերակատարում ունի։ Եկեղեցին ազգի հենասյուներից մեկն է, ազգային կարևորագույն արժեք։ Չի կարելի այս հանգամանքները մոռանալ։

Panorama.am-Շնորհակալություն հարցերին պատասխանելու համար։