Ձեր վստահելի աղբյուրը

Նախօրեին Երևան-Սևան ճանապարհին գազալցակայանի պայթյունի հետևանքով վերակենդանացման բաժանմունքում գտնվող երկու տուժածների վիճակը գնահատվում է ծայրահեղ ծանր, վերակենդանացման բաժանմունքում են, պայքարում են կյանքի համար։ news.am-ի հաղորդմամբ, լրագրողների հետ զրույցում ասել է ՀՀ ԱՆ «Այրվածքաբանության և մաշկաբանության ազգային կենտրոն» ՓԲԸ–ի տնօրեն Հովհաննես Հովհաննիսյանը։

Նա նշել է, որ երկու տուժածներն ունեն մարմնի մակերեսի 60 տոկոսի այրվածք, թոքային հյուսվածքի վնասում:

«Նրանք ունեն 3-4-րդ աստիճանի այրվածքների խորություն: Գրեթե ամբողջությամբ այրված է մեջքը, վերջույթները։

Ծանր վիճակում գտնվող պացիենտները շոկային վիճակում են, դրա համար մենք միջամտում ենք, որ անջատենք իրենց գիտակցությունը, որպեսզի ցավային ռեակցիան շատ արտահայտված չլինի, կարողանանք որոշակի գործողություններ անել: Նման պացիենտների անգամ վիրակապությունը չափազանց ծանր  միջամտություն է: Մենք դրան վիրահատություն ենք ասում, և անգամ հնարավոր է ընդհանուր նարկոզավ դա արվի»,-ասել է Հ.Հովհաննիսյանը:

Հիշեցնենք, որ պայթյունի և հրդեհի հետևանքով տուժել է 7 քաղաքացի, որոնցից 1-ը «Աբովյան» ԲԿ-ում ստանալով համապատասխան բուժօգնություն՝ դուրս է գրվել, իսկ 6-ը գտնվում են «Այվածքաբանության և մաշկաբանության ազգային կենտրոն» ՓԲԸ-ում։ Տուժածներից 6-ը տղամարդ են, մեկը կին։ Այրվածք ստացածներից մեկի կինն է։

Ինչ վերաբերում է տուժած 4 քաղաքացիներին, Հովհաննես Հովհաննիսյանն ասել է. «Նրանց վիճակը գնահատվում է միջին ծանրության, կայուն: Նրանք գտնվում են բաժանմունքում, վիրակապություններ և համապատասխան բուժում են ստանում: Նրանք ունեն 20-25 տոկոս այրվածքի մակերես և մոտավորապես 2-րդ աստիճանի խորություն:

Նրանք ոտքի վրա են, գիտակցությունը տեղն է, իրենք իրենց սպասարկում են: Հիմա որոշակի միջամտություններ ենք կատարում, որից հետո հարազատներին թույլ կտանք մոտենալ որպես խնամակալ»: