Ձեր վստահելի աղբյուրը

«Տիկին Սարգսյան, տեղյակ եք՝ կա՞ արդյոք քրեական վարույթ, կապված լրագրողների անձնական տվյալների հրապարակման ու նրանց նկատմամբ ատելության քարոզի հետ»,- ԱԺ պաշտպանության և անվտանգության հարցերի մշտական հանձնաժողովի նիստում ՆԳ փոխնախարար Արփինե Սարգսյանին հարցրեց ՔՊ-ական պատգամավոր Վահագն Ալեքսանյանը և հավելեց. «Վերջերս տելեգրամյան ողորմելի որոշ ալիքներ, որոնք ծառայում են իրենց ողորմելի տերերին, որոնք իրենց ողորմելի քաղաքական պայքարը փորձում են ամեն դեպքում շարունակել, չնայած մարել է, թիրախավորում են ու որակավարում լրագրողների նկարներ»:

Նրա խոսքով՝ պատգամավորների դեպքը դեռ ընդունելի է, բայց լրագրողները, ըստ Ալեքսանյանի,  զարգացած հասարակություններում առանձնահատուկ պաշտպանվածության որոշակի կարգավիճակ ունեն։

«Խնդրում եմ միասին քննարկել այս հարցը և կհորդորեմ, որպեսզի դիմեն նման քրեական վարույթ հարուցելու նպատակով, որովհետև խիստ դատապարտելի երևույթի հետ գործ ունենք»,-ասաց Ալեքսանյանը։

Նա նկատի ուներ  իշխանական լրատվամիջոցի աշխատակցին:

«Հայաստան» խմբակցության պատգամավոր Գեղամ Մանուկյանն էլ ասաց. «Միանգամից հավելենք նաև՝ լրագրողների կողմից զրպարտչական նյութերը, օրինակ ԱԱԾ գործակալ լինել, ՌԴ-ից միլիոններ ստանալ, որոնք հերքվում են»:

Ալեքսանյանը հարցրեց, թե ո՞վ է հերքել։

Մանուկյանը հիշեցրեց, որ ԱԱԾ-ից են հերքել։

«ԱԱԾ-ն չի կարող հերքել ՌԴ գործակալ լինել-չլինելը, ԱԱԾ-ն ասել է ես նման տեղեկություն չունեմ: Նման բանը կարող են հերքել Լյուբյանկայից ու դեռ չեն հերքել: Իգոր Կորոտչենոն էլ հայտնել էր, որ միլիոններ են փոխանցվել»,- հայտարարեց ՔՊ-ական պատգամավորը։