Ձեր վստահելի աղբյուրը

«Նահանջելու տեղ չունենք, ընկրկելու տեղ էլ չունենք, որևէ ձևով մեր պայքարից հետ կանգնելու ճանապարհ չունենք, որևէ ձևով, որևէ կերպով, սա պետք է հասնի մինչ վերջ՝ անկախ նրանից, թե քանի շարք ոստիկանություն կկանգնի մեր դիմաց»,- Պռոշյան փողոցում հայտարարեց «Տավուշը հանուն հայրենիքի» շարժման առաջնորդ Բագրատ արքեպիսկոպոս Գալստանյանը։

Բագրատ Սրբազանն ասաց, որ վերադառնում են Բաղրամյան փողոց՝ միանալու իրենց մյուս ընկերներին։

Սրբազանը վստահ է, որ առավոտյան ավելի շատ մարդ է լինելու։

«Մենք մեր անելիքն անելու ենք, մեր ուզածին հասնելու ենք»,- հայտարարեց Բագրատ Սրբազանը։

Սրբազանը նաև ոստիկաններին դիմեց. «Ոստիկաններն իրենց խոստումը չեն կատարել և այստեղից մարդ են առևանգել։ Դե ստի թագավորության մեջ ենք ապրում, ի՞նչ պիտի լինի։ Խաբելով, գողանալով մարդ են տանում։ Բայց ժամանակը կգա, դրա պատասխանն էլ պիտի տրվի։ Ինչպես խեղճ-խեղճ պատասխանները լրիվ տվել են՝ անկախ իրեն ուսադիրներից։ Գեներալ են, գնդապետ են, ինչ են՝ հող հանձնող են։ Իրենց աչքերի առջև են Կիրանցը, Ոսկեպարը գծվել, տրվել թշնամու ձեռքը։ Այս բոլորի աչքի առջև են Արցախը հանձնել։ Եվ այս մարդիկ որևէ ձևով անգամ շունչ չեն քաշել, փռշտացել անգամ, որ այսպիսի բան է տեղի ունեցել։ Չեն ընդվզել, մի բառ անգամ չեն ասել»։

Հիշեցնենք, որ ոստիկանությունը արգելափակել է Դեմիրճյան փողոցը, «Տավուշը հանուն հայրենիքի» շարժման անդամներին, քաղաքացիներին, Բագրատ արքեպիսկոպոս Գալստանյանի գլխավորությամբ,  թույլ  չեն տալիս շարունակել խաղաղ երթը։ Քաղաքացիները բաժանվել են երկու մասի՝ Բաղրամյան և Պռոշյան փողոցներում են հավաքվել։