Ձեր վստահելի աղբյուրը

«Քիչ առաջ հանդիպում ենք ունեցել քաղաքական թիմերի հետ՝ քննարկել ենք այս գործվածին։ Թեպետ մեզ համար անսպասելի  չէր և անակնկալ  չէր, բայց սա պետք է պատասխան ստանա»,- այս մասին Բաղրամյան պողոտայում հայտարարեց Բագրատ սրբազանն՝ անդրադառնալով ԱԺ արտահերթ նիստ անցկացնելու  իշխող ուժի մերժմանը։

Սրբազանը շեշտեց, որ իշխող ուժը լեգիտիմություն չունի։

«Այս բառը՝ լեգիտիմություն, ծամծմվելով գցել են մեջտեղ, իբրև ՝ ընտրվել են ու վերջ, բայց խաբեությամբ եք ընտրվել։ Ստել եք և ընտրվել, հետևաբար այդ ընտրությունը ՝չընտրություն է»,- ասաց նա։

Անդրադառնալով առաջիկա օրերի անելիքներին, Բագրատ սրբազանը նախ հայտնեց, որ  վրանները մնալու են տեղում։

«Կարելի է ասել ՝մեր ճամբարն է այստեղ, բայց ամիսներով չի մնալու։ Անելիք ունենք, 96 ժամ էի ասել, դրանում կսահմանափակվենք՝ հուսալով, որ կլինի այն , ինչ մենք ուզում ենք»,- ասաց Բագրատ սրբազանը։

Նա  տեղեկացրեց, որ վաղն առավոտից տարբեր գործողություններ են տեղի ունենալու՝ տարբեր վայրերում։

«Մենք այսօր գիշերը մնալու ենք այստեղ։ Այսօր որևէ գործողություն տեղի չի ունենա, լինելու է վրանային հանգրվան, կտեղակայվենք։ Ամսի 12-ը շատ կարևոր է մեզ համար։ Բազմաթիվ ուժերի ներկայությունը չափազանց կարևոր է, թե ինչ կանենք դա ուրիշ հարց, բայց այստեղ գտնվելը չափազանց կարևոր է»,- ասաց սրբազանը։ 

Նա դիմեց  բոլորին, որոնք ցանկանում են իրենց անհամաձայնությունը ֆիզիկական ներկայությամբ հայտնել, հունիսի 12-ին գալ ԱԺ-ի դիմաց։ 

«Վստահեցնում եմ, որ եթե այստեղ, երեկվա կամ առաջին օրվա, կամ դրանից առաջ՝ ամսի 9-ի չափ ժողովուրդ եղավ, մեր հարցերը լուծվելու են։ Ո՛չ իրենց փշալարերն է օգնելու, ո՛չ ջրցան մեքենաները և ո՛չ էլ իրենց ահասարսուռ տեսքերը։ Ժողովուրդ ջան, 96 ժամը լրանում է հունիսի 12-ին, ժամը 15։00-ին այստեղ ենք լինելու։ Ով ինչ գործ ունի թող հետաձգի, ամսի 12-ին, ժամը 15։00-ին։ Հունիսի 12-ին մեր ներկայությամբ կարող է շատ բան փոխվել»,- ասաց նա։