Ձեր վստահելի աղբյուրը

Նիկոլ Փաշինյանի հրաժարականի պահանջով ԱԺ արտահերթ նիստ չի գումարվի, ԱԺ խորհուրդը մերժել է ընդդիմադիր «Հայաստան» և «Պատիվ ունեմ» խմբակցությունների միջնորդությունը։         

««Քաղաքացիական պայմանագիր խմբակցությունը խորհրդի իր ողջ կազմով դեմ քվեարկեց այդ  նախագծին»,-  նիստից հետո լրագրողներին ասաց ՔՊ խմբակցության ղեկավար Հայկ Կոնջորյանը։   

Ազգային ժողովրի խորհրդի նիստում քննարկվել է ԱԺ ընդդիմադիր «Հայաստան» և «Պատիվ ունեմ» խմբակցություններն արտահերթ նիստ գումարելու պահանջով միջնորդությունը, որով առաջարկել են արտահերթ նիստի օրակարգում ընդգրկել կառավարության հրաժարականի և նոր կառավարության ձևավորման մասին ԱԺ ուղերձը։

«Մենք նման օրակարգ չունենք, հետևաբար այդ օրակարգը մեզ համար քննարկելի չէ։ Հայաստանում կա լեգիտիմ խորհրդարան, լեգիտիմ վարչապետ, լեգիտիմ իշխանություն, հետևաբար մենք նման օրակարգ չունենք»,- ասաց ՔՊ-ականը։ 

Նշենք, որ ըստ օրենքի հունիսի 17–ին կարող է գումարվել այդ օրակարգով նիստ

Հիշեցնենք, որ նախօրեին հանրահավաքի ժամանակ «Տավուշը հանուն հայրենիքի» շարժման առաջնորդ Բագրատ արքեպիսկոպոս Գալստանյանը դիմել էր Ազգային ժողովի ընդդիմադիր խմբակցություններին. «Մեր պահանջով  Ազգային ժողովի ընդդիմադիր պատգամավորները նախաձեռնում են խորհրդարանի արտահերթ նիստ հունիսի 11-ին` ժամը  18։30-ին,  կառավարության հրաժարականի և նոր կառավարություն ձևավորելու օրակարգով»։ 

Քանի որ ԱԺ խորհուրդը մերժել է արտահերթ նիստ հրավիրելու միջնորդությունը, ըստ օրենքի, հունիսի 17-ին, կարող է գումարվել այդ օրակարգով նիստ։