Ձեր վստահելի աղբյուրը

«Երեկվա  հանրահավաքի ժամանակ Բագրատ սրբազանը հստակ ժամկետ նշեց, որպեսզի  արտահերթ նիստ  տեղի ունենա վաղը՝ ամսի 11-ին։ ԱԺ նիստում  պետք է քննարկվեր Կառավարության 2021-2026 թթ․-ի ծրագրերի դրույթների տապալման պատճառով Կառավարության հրաժարական ներկայացնելու հարցը»,- այս մասին Բաղրամյան պողոտայում լրագրողների հետ զրույցում ասաց   «ՀայաՔվե» նախաձեռնության համահիմնադիր Մենուա Սողոմոնյանն՝ անդրադառնալով ԱԺ -ի արտահերթ նիստ անցկացնելու  իշխող ուժի մերժմանը։

Նրա խոսքով՝  ԱԺ-ն պետք է  ընդունի հայտարարություն՝ Կառավարության հրաժարականի պահանջի մասին, քանի որ ԱԺ-ն է Կառավարություն ձևավորվել։

«Սա իր բնույթով տարբերվում է անվստահություն ներկայացնելու գործընթացից, սակայն քաղաքական թիրախայնության տեսանկյունից համարժեք է։ Եթե պատգամավորների մեծամասնությունը՝ 54 հոգին, պահանջում է, որ Կառավարությունը հրաժարական տա, ապա նշանակում է, որ ուժային բալանս է փոխվում։  Իմ տեղեկությամբ՝ արտահերթ նիստ հրավիրելու պահանջը ցինիկ ձևով մերժվել է, ինչին ի պատասխան պետք է այստեղ շատանանք և ժողովրդական ճնշում գործադրելով ստիպենք, որպեսզի այդ արտահերթ նիստը գումարվի և կառավարության հրաժարականի պահանջի  օրակարգային հարցը դառնա քննարկման հարց»,- ասաց նա։

Նա ընդգծեց․որ ըստ կանոնակարգի հնգօրյա ժամկետում նիստը պետք է կայանա։

«ՔՊ-ն հայտարարել է, որ բոյկոտելու  է այդ նիստը ։ Եվ, որպեսզի նիստը տեղի ունենա, մենք պետք է նրանց նկատմամբ իրականացնենք ճնշում՝ հանրային, Սահմանադրական օրենքով նախատեսված ճնշում։ Մեր հայրենակիցներին կոչ ենք անում, որ ակտիվ լինեն և  մի կողմ դնի մնացած գործերն ու այս կարևոր գործին»,- ասաց Սողոմոնյանը՝ հավելելով, որ որքան արագ շատանանք, այդքան արագ կլուծվի այդ հարցը։

Անդրադառնալով ոստիկանական ուժերի գործողությանը, Սողոմոնյանն ընդգծեց․« Մենք պետք է նպաստենք, որպեսզի ոստիկանությունը ձեռքերը վեր բարձրացնի։ Մեր քանակն ու ակտիվությունը ուղիղ համեմատական է ոստիկանության հանձնվելուն։ Փաշինյանի իշխանությունն այսօր միայն հենվում է ոստիկանական ռեսուրսի վրա։ Մեզանից է կախված այդ ռեսուրսի մաշեցումը»։