![](https://panorama.am/news_images/1005/3014884_1/mhm0156752.thumb.jpg)
Այլևս չե՞ք սիրում բոլորին, սառե՞լ է ձեր սերը. Ռուստամյանը՝ ՔՊ-ականներին
«Ստեղծվել է մի իրավիճակ, դուք էլ փաստել եք՝ կա խզում, որն արձանագրվել է կառավարության ծրագրի ու նրա գործողության միջև։ ԱԺ մեծամասնությունը, որ դուք եք, ընդունել եք մի ծրագիր, որը կառավարությունը չի իրականացնում»,- ԱԺ նիստում դիմելով ՔՊ-ական պատգամավորներին՝ ասաց «Հայաստան» խմբակցության պատգամավոր Արմեն Ռուստամյանը։
Նա նշեց, որ այդ խզումը պետք է վերացնի, լուծի ՔՊ-ն. «Այդ խզումները շատ լուրջ են ու պետք է վերացվեն՝ կամ այս կառավարությունը փոխում է ծրագիրը, նոր ծրագիր է ընդունվում ԱԺ կողմից, դա խորհրդարանական համակարգին բնորոշ գծերից մեկն է, կամ այդ կառավարությունը հրաժարական է տալիս։ Այլ ձև գոյություն չունի»։
Ռուստամյանը նշեց, որ ստեղծված իրավիճակը որևէ ուժի համար տանելի չէ, համախմբում է անհրաժեշտ, ինչն առաջարկում են։
«Դուք մերժում եք դա։ Ի՞նչ եք ասում ըստ էության՝ մենք մեծամասնություն ենք, մանդատ են տվել, ինչ ուզենք, այն էլ կանենք, մենք մի բան ասել ենք, կարող ենք այլ բան անել։ Սա կոչվում է պարզապես ստի փառաբանում։ Դուք ստի ու կեղծիքի փառաբանմամբ եք զբաղված ու դա դարձրել եք պետական քաղաքականության հիմք։
Ձեզ հռչակել եք ժողովրդավարության բաստիոն։ Առնվազն երկու նախագիծ է եղել, որ հազարավոր մարդիկ ուզում էին այդ հարցը քննարկվի ԱԺ-ում, բայց մերժեցիք։ Բա ո՞ւր մնաց այն, որով իշխանության եք եկել՝ բոլորին սիրում եք, խոնարհվում եք բոլորի առաջ։ Սուտ է ուրեմն այդ ամեն ինչը։ Այլևս չե՞ք սիրում, սառե՞լ է ձեր սերը, ի՞նչ է տեղի ունեցել։ Դուք ինքներդ ձեր մեջ այդ վերլուծությունը կատարեք։ Իսկ ի՞նչ է բացահայտվում, որ ամեն ինչից շատ, ամեն ինչի վեր սիրում եք դուք ձեր աթոռը։ Սա է իրականությունը ու սա արձանագրվելու է, չեք կարողանալու խուսափել»։
Նա դեռ չէր ավարտել խոսքը, երբ Ալեն Սիմոնյանը անջատել տվեց բարձրախոսը՝ ժամանակը լրանալու պատճառով։
Հարակից հրապարակումներ`
- Չեմ հասկանում, թե դուք ինչո՞ւ եք եկել նիստի. Ռուբինյանը՝ ընդդիմությանը
- Իմ ու ձեր արածները որևէ բանով իրարից չեն տարբերվում. Ալեն Սիմոնյանը՝ Արծվիկ Մինասյանին
Լրահոս
Տեսանյութեր
![Թուրքիան ու Ադրբեջանն այլևս միասնական իրողություն են դրանից բխող բոլոր հետևանքներով. Մելքոնյան](https://panorama.am/video_images/17/50811_1/mela_6760_thumb_v1_thumb_v1_thumb.thumb.jpg)
Թուրքիան ու Ադրբեջանն այլևս միասնական իրողություն են դրանից բխող բոլոր հետևանքներով. Մելքոնյան