Ձեր վստահելի աղբյուրը

«Հայաստանի վարչապետը չի ասել, թե Հայաստանը դուրս է գալիս ՀԱՊԿ-ից»,-Ազգային ժողովում կառավարության հետ հարցուպատասխանի ժամանակ հայտարարեց ՀՀ արտգործնախարար Արարատ Միրզոյանը՝ անդրադառնալով քիչ առաջ Նիկոլ Փաշինյանի արած հայտարարություններին։

«Հայաստանի Հանրապետության վարչապետն ասել է՝ մենք կորոշենք՝ երբ դուրս կգանք, մենք կորոշենք, բայց հետ չենք գնա։ Սա է ասել՝ ոչ պակաս, ոչ էլ ավելի։ Եթե որևէ մեկը պնդում է, որ Հայաստանի վարչապետն ասել է՝ Հայաստանը դուրս է գալիս ՀԱՊԿ-ից, սխալվում է, և սա շատ հեշտ ապացուցելի է։

Կրկնում եմ՝ կարող ենք ձայնագրոթյունը հետ տալ ու նայել, վարչապետն ասել է՝ մենք կորոշենք, երբ դուրս գանք, բայց ետ չենք գնալու»,- ասաց Միրզոյանը։

Հիշեցնենք, որ հարցուպատասխանի ժականակ Փաշինյանն ասել է. «Ովքեր ձևավորել էին փուչիկ դաշինք, որի անդամները պարզվեց ոչ թե  իրենց պայմանագրային պարտավորություններ են կատարում, այլ գնացել, Ադրբեջանի հետ պլանավորում են մեր դեմ պատերազմը։ Այ դրանք են մեղավորը»։

Տեղից արձագանքին՝ «բա դուրս եկեք», ասաց. «Դուրս կգանք։ Դրանով էլ վախեցնո՞ւմ եք։ Լավ ենք անում, մենք կորոշենք երբ դուրս գանք։ Ասում ենք, պակա՞ս է եղել այդ ասելիքի։ Ձեր կարծիքով հաջորդ քայլը ո՞րն է։ Բա կարո՞ղ է հետ գնանք։ Ուրիշ ճանապարհ չկա»։