Ձեր վստահելի աղբյուրը

«Մարդկանց բերման են ենթարկել առանց պատճառի։ Ինչո՞ւ։ Մարդիկ խաղաղ իրենց անհնազանդության ակցիան էին անում։ Որևէ բան արե՞լ են»,- դիմելով ոստիկաններին՝ ասաց «Տավուշը հանուն հայրենիքի» շարժման առաջնորդ Բագրատ արքեպիսկոպոս Գալստանյանը։ 

Գնդապետ Պետրոսյանն ասաց, որ կճշտի ինչի համար են բերման ենթարկել։ 

«Լրիվ ապօրինի գործողություն է։ Թող կասկած չունենան, որ ես հանկարծ ոտքս հետ եմ դնելու։ Չեն կարող մարդ գողանալ, մենք եկել ենք խաղաղ, հանգիստ մեր պահանջը ներկայացնելու։ Ոստիկանության պարտականությունն այդ մարդկանց պաշտպանելն է, ոչ թե գողանալը։ Խնդրում եմ տեղեկացրեք ձեր ղեկավարությանը»,- ասաց Սրբազանը։ 

Քիչ անց գնդապետ Պետրոսյանն ասաց, որ Դեմիրճյան-Պռոշյան հատվածում է եղել, ոստիկանությունը նախապես հայտարարել է՝ դուրս գալ այդ հատվածից, դուրս չեն եկել, որից հետո ոստիկանների այդ պահանջը չկատարելու համար որոշ մարդիկ բերման են ենթարկվել։ 

Իրավապաշտպան Սերգեյ Հարությունյանը հետարքրքվեց, թե ինչո՞ւ են Պռոշյանի հատվածում գտնված քաղաքացիների ազատ տեղաշարժման  իրավունքը սահմանափակել։ 

Հիշեցնենք, որ Պռոշյան փողոցում ոստիկանները փակել են երթի մասնակիցների առջև ճանապարհը, հորդորում են նրանց դուրս գալ երթևեկելի մասից։ Այնուհետև ոստիկանները սկսեցին բերման  ենթարկել քաղաքացիներին, նաև մայթով քայլող։