Ձեր վստահելի աղբյուրը

«Եթե արել եմ, լավ եմ արել, դա խուլիգանական պատնեշ է, ոչ թե ոստիկանական»,-կառավարության մոտ ասաց «Տավուշը հանուն հայրենիքի» շարժման առաջնորդ Բագրատ արտեպիսկոպոս Գալստանյանը՝ անդրադառնալով ԱԺ նախագհ Ալեն Սիմոնյանի երեկա հայտարարությանը, թե «հոգևորականը կոչ է արել գրոհել ոստիկանական պատնեշը»։

«Այդ մարդու կյանքը առնչված է «ակվարիումի» հետ ու մնացած բաների հետ, որ դեռ խնայում եմ ասելու։ Ընդհանրապես թող աչքի չընկնի, ոտքի տակ էլ չհայտնվի, ինքն ընդհանրապես գոյություն չունի։

Լսե՞լ եք, որ ասեմ գրոհեք ոստիկանական պատը։ Հասկանո՞ւմ եք՝ այս մարդիկ ստի կրողներ են վերից վար։

Այո, ես գնացել եմ կարմիր բերետավորների հետևից, որովհետև մարդկանց մորթում էին բառի բուն իմաստով այգու մեջ։ Մարդիկ խաղաղ կանգնած էին այգու մեջ, նետում էին նրանց վրա այդ նռնակերը։ 

Ոստիկանություն որպես այդպիսին գոյություն չունի, կան ներդրված խուլիգանական խմբեր, որոնք գործում են, մարդկանց ծեծում, ջարդում 10, 20, 30 հոգով»,- ասաց Սրբազանը։

Հիշեցնենք, որ նախօրեին, երբ ԱԺ մոտ ոստիկանությունը լուսաձայնային հատուկ միջոցներ կիրառեց, ԱԺ նախագահ Ալեն Սիմոնյանը հայտարարել էր. ««Բագրատ Գալստանյանը դրսում հայտարարել է, ԶԼՄ-ների համաձայն, այստեղ մենք իրար ծեծում ենք՝ ուղղորդելով մարդկանց գրոհել ոստիկաններին։ Դրանից հետո քաղաքացիները սկսել են Սիրահարների այգու միջոցով փորձել ներխուժել ոստիկանական պատնեշներից ներս։
Ոստիկանությունն արդարացիորեն կիրառել է լուսաձայնային  նռնակները։ Այս ամենը կազմակերպվել և նախատեսվել է շատ վաղուց»։