Ձեր վստահելի աղբյուրը

«Իրազեկ քաղաքացիների միավորում» հ/կ-ի ծրագրերի համակարգող Դանիել Իոաննիսյանն անընդունելի է համարում ձեռքի (դաստակի) էական վնասվածք ստացած քաղաքացուն մեղադրելը իր ստացած վնասվածքի համար։

«Նախ, որևէ մեկը չի կարող պնդել (թեև Հ1-ը դա անում է), որ քաղաքացին նռնակը ուզում էր նետեր ոստիկաննների ուղղությամբ։ Մենք չգիտենք, թե ինչ էր ուզում քաղաքացին աներ նռնակի հետ, կարող է մտքին պարզապես դեն նետելն էր։

Երկրորդ` քաղաքացին պարտավոր չէր իմանալ, թե ինչպես պետք է, կամ ինչպես պետք չի վարվել դեռևս չպայթած նռնակի հետ։

Երրորդ (ու ամենակարևորը)` քաղաքացին նման իրավիճակում չէր հայտնվի, եթե լուսաձայնային նռնակները կիրառվեր ՀՀ Առողջապահության նախարարի 2012 թվականի 90-Ն հրամանով սահմանված կարգով՝ պահպանվելով կիրառվելու՝ մարդկանցից նվազագույն 2,5 մետր հեռավորությունը»,- գրել է նա։ 

Հիշեցնենք, որ այսօր Ազգային ժողովում Նիկոլ Փաշինյանն ասել է. «Քաղաքացիներից մեկը վիրահատվել է, ձեռքի մատներից 3-ը հեռացվել են, ինչի համար ցավում եմ։

Բայց նաև տեսանյութերից ակնհայտ դարձավ, որ քաղաքացին ինքը գետնից վերցրել է ոստիկանների նետած հատուկ միջոցը, որը կյանքի համար անվտանգ է, որը պայթել է նրա ձեռքի մեջ»։