Ձեր վստահելի աղբյուրը

«Որոշումով ակնկալվում է, որ պետական իշխանության մարմինների կողմից օգտագործվող տեղեկատվական համակարգերի, դրանցում առկա տվյալների, տեղեկատվության պահպանման նպատակով ավանդական սերվերների փոխարեն պետք է կիրառվեն ամպային լուծումներ»,- կառավարության նիստում հայտնեց ԲՏԱ նախարարի տեղակալ Ռուբեն Սիմոնյանը՝ զեկուցելով «Ամպայինն առաջինը» քաղաքականության մշակման և ներդրման մասին որոշումը։

Նրա խոսքով՝ այն կապահովի հանրային ծառայության ոլորտում ոչ գաղտնի տեղեկությունների պահուստավորման և վերականգնման մեխանիզմներ՝ տվյալների կորստից պաշտպանվելու համար:

Սիմոնյանը հայտնեց, նախագծով առաջարկվում է, որ սկզբնական փուլում ամպային տիրույթում են տեղադրվելու այն տվյալները և տեղեկատվությունը, որոնք չեն լինի պետական գաղտնիք և հանրային տեղեկությունների դասակարգման արդյունքներով կհամարվեն ցածր ռիսկայնության:

Նրա խոսքով՝ որոշմամաբ նախատեսվում է, որ հանրային իշխանության մարմիններն իրենց տնօրինության տակ գտնվող, պետական գաղտնիք չհանդիսացող, գաղտնիության, ամբողջականության և հասանելիության չափորոշիչներով ցածր ռիսկայնությամբ դասակարգված հանրային տեղեկությունը տեղադրեն ամպային տիրույթում, որոշակի ժամկետով պահպանեն գործող սերվերային համակարգերը որպես հիմնական տարբերակ՝ մինչև ամպային տիրույթ տեղափոխած տարբերակի հաջողված փորձարկումը։

Փոխնախարարի խոսքով՝ պետք է պահպանեն այդ տեղեկությունների պահուստային տարբերակը՝ նվազագույն անհրաժեշտ սերվերային ենթակառուցվածքների ներգրավմամբ, պետք է ձեռնպահ մնան պետական տեղեկատվական համակարգերի, տվյալների և տեղեկատվության պահպանման նպատակով առանձին սերվեր ձեռք բերելու գործընթաց նախաձեռնելուց: