Ձեր վստահելի աղբյուրը

«Երեկ համացանցում ինչ-որ ձայնագրություններ է հայտնվել, որի արդյունքում քննչական մարմինները հարուցում են քրեական գործ։ Այսօր առավոտվանից սկսած խուզարկություններ են Վայքի և Եղեգնաձորի դաշնակցության գրասենյակում այս մասին լրագրողների հետ զրույցում հայտնեց ՀՅԴ ԳՄ ներկայացուցիչ, ԱԺ պատգամավոր Իշխան Սաղաթելյանը։

Նա նշեց, որ Վայոց ձորի կառույցի շուրջ 10 ղեկավար անդամների ձերբակալել են։

«Կարող եմ ասել՝ առևանգված են, քանի որ մարդկանց առևանգել են․ գտնվելու վայրը մեծ դժվարությամբ են կարողանում ճշտել, փաստաբանները չեն կարողանում մոտենալ։ Իրենց կարճ խելքով փորձում են ցուցմունքներ կորզել՝ չհասկանալով,թե ում հետ  գործ ունեն։ Չեն տրամադրում տեղեկություններ,թե մեր առևանգված ընկերները որ բաժնում կամ քննչականում են»,- ասաց նա։

Իշխան Սաղաթելյանը նաև հայտնեց, որ այս պահին պատգամավորները գտնվում են Վայոց ձորի մարզում, որոնք փորձում են ձերբակալվածների տեղերը ճշտել։

«Անընդհատ խոչընդոտներ են ստեղծում և՛ փաստաբանների, և՛ պատգամավորների  համար, ակնհայտ է, որ կուսակցությունն ամբողջությամբ թիրախավորված է։ Իրենց կարճ խելքով էս ճանապարհով փորձում են կեղծ, շինծու քրեական գործերով ճնշում բանեցնել, թիրախավորել, բայց դաշնակցության պարագայում այսպիսի բաները չեն կարող անցնել։ Սա ոչ առաջինն է, ոչ էլ՝ վերջինը»,- ընդգծեց քաղաքական գործիչը։

Նրա խոսքով՝ այս պահին շուրջ տասը հոգու մասին տեղեկություն ունեն, որոնց թվում նաև՝ կանայք, սակայն անընդհատ ավելանում է թիվը։

«Խուժանությունը չափ ու սահման չունի։ Երբ երկրում լինում է շարժ, ժողովրդական ընդվզում, այդ ֆոնի վրա փորձում են թիրախավորել և սա առաջին դեպքը չէ։ Սա հստակ պայմանավորված է Հայաստանում տեղի ունեցող իրադարձության՝ «Սրբազան պայքարի» հետ։ Ծիծաղելի այն է, որ այսօրվա կուսակցության գաղափարական հայրերը մոտ 20 տարի առաջ այս ամեն ինչն արել են Դաշնակցության նկատմամբ՝ ղեկավարությանն են ձերբակալել, կուսակցության գործունեությունն են կասեցրել։ Հիմա թող պտտվեն ու նայեն՝ դրանք ուր են, իսկ Դաշնակցությունն ուր է։ Սենց բաները մեր վրա չի ազդել ու չի ազդելու, ավելի է համախմբելու, իսկ այս բոլոր խուժանություններ արածները հատ-հատ պատասխան են տալու»,- ասաց Սաղաթելյանը։

Նա պատմեց, որ նաև եկել են Երևանի գրասենյակ, սակայն դիմադրության են արժանացել։ Քաղաքական գործիչն ասաց, որ պատրաստ են ցանկացած սցենարի։

«Մենք գործ ունենք թրքահպատակ մի իշխանության հետ և բնական է, որ երկրի ազգային ուժերի նկատմամբ պետք է շարունակի ճնշումը, որպեսզի կարողանա մեր թշնամիների հետ ծրագիրն իրականացնի։ Մենք ցանկացած սցենարի պատրաստ ենք և նման մեթոդներով  ոչ մի բանի չեն հասնելու։ Երկու տարի առաջ էլ 50 դաշնակցական ձերբակալ էին, ինչի՞ հասան»։

Ըստ քաղաքական գործչի՝ ձայնագրության մեջ անուններ են շրջանառվում և կան անձիք, որոնց կողմից թիրախավորված են։

«Հասկանում ենք, որ փորձում են մեծ «գործ կարեն» և ինչ-որ մարդկանց տանեն այս ճանապարհով ձերբակալեն։ Ձայնագրությունները խուժանության մասին է։Այդ անուններն ինչ կապ ունեն էդ ամեն ինչի հետ։  Ես չեմ հասկանում ՝ ԱԱԾ ու ոստիկանությունը civic-ի մո՞տ են աշխատում, ուղարկում են զապիս են անում, հետո գո՞րծ են հարուցում։ Մամուլում ձայնագրություններ են հայտնվում , հետո քրական գործեր են հարուցում դրա հիման վրա։ Հիմա ուզում եմ հասկանալ՝ civic-ն ա՞ ձայնագրություններ անում՝  ով ա ում մոտ աշխատում, պասերով ։ Էս ամեն ինչը սարքած խուժանություն ա»։