Ձեր վստահելի աղբյուրը

Ազգային ժողովի պատգամավոր Իշխան Զաքարյանին, կնոջը, որդուն ու հարսին հունիսի 17-ին հրավիրել են Գլխավոր դատախազության ապօրինի ծագում ունեցող գույքի բռնագանձման գործերով վարչություն՝ նրանց պատկանող գույքի առնչությամբ իրականացված ուսումնասիրության  նյութերին ծանոթանալու համար: Այս մասին գրում է «Հետք»-ը։

«Ուսումնասիրվել է Իշխան Զաքարյանի, կնոջ՝ Գայանե Սողոմոնյանի, որդու՝ Վարդան Զաքարյանի և հարսի՝ Սեդա Ադամյանի գույքը: Կազմվել է ամփոփագիր: Սակայն դատախազությունն այս փուլում չի հրապարակում, թե ինչ գույք, այդ թվում՝ դրամական միջոց բռնագանձելու պահանջ է առաջ քաշվել: Պատճառաբանությունն այն է, որ գործի նյութերին ծանոթանալուց հետո կարող է ներկայացվեն նոր ապացույցներ, և փոխվի ենթադրաբար ապօրինի ծագում ունեցող գույքի ցանկը:

Նշենք, որ Իշխան Զաքարյանը պատգամավոր է ընտրվել 2021թ.՝ ընդդիմադիր «Պատիվ ունեմ» կուսակցությունների դաշինքի համապետական ընտրական ցուցակով: Այնուհետև դուրս է եկել խմբակցությունից և հանդես է գալիս որպես անկախ պատգամավոր: Մինչ այդ «Ծառուկյան» խմբակցության պատգամավոր էր, իսկ 2007-2017թթ. եղել է Վերահսկիչ պալատի նախագահը:

Իշխան Զաքարյանի կինը՝ Գայանե Սողոմոնյանը, երկար տարիներ (2009-2017) զբաղեցրել է Երևանի քաղաքապետարանի հանրակրթության վարչության պետի պաշտոնը: Այժմ «Վարդանանք» կրթահամալիրում խորհրդական է: «Վարդանանք» կրթահամալիր ՍՊԸ-ն 2022թ. հիմնել է ինքը՝ Գայանե Սողոմոնյանը: Նա է ընկերության միակ սեփականատերը, իսկ դուստրը՝ Շուշանիկ Զաքարյանը, ընկերության տնօրենն է:

Հարկադիր կատարման ակտերի ծառայության ապօրինի ծագում ունեցող գույքի բռնագանձման և հատուկ նշանակության բաժինը հունիսի 12-ին արգելանք է դրել Գայանե Սողոմոնյանի՝ «Ակբա» բանկում ներդրած ավանդի մոտ 3 մլն 649 հազ դրամի և մեկ այլ ավանդով ներդրված  ավանդից 40 մլն դրամի տնօրինման հետ կապված որևէ գործողության վրա: Իսկ Իշխան Զաքարյանին պատկանող գույքի վրա 755 մլն դրամի չափով է արգելանք դրվել:

Իշխան Զաքարյանի որդին՝ Վարդան Զաքարյանը, ձեռնարկատեր է: Մի շարք ընկերություններում սեփականատեր է: Մասնավոարապես, նրան է պատկանում «Բամելեքս» ՍՊԸ-ն, որը, ըստ Պետեկամուտների կոմիտեի կայքում առկա տեղեկատվության, զբաղվում է կենցաղային ապրանքների մեծածախ առևտրով:

Վարդան Զաքարյանն այս ընկերության սեփականատերն է 2013թ. հոկտեմբերից: Ընկերությունը ստեղծվել է 2009թ-ին:

«ՎԻ ԱՐ ԷՆԵՐՋԻ ԱՐ ԷՅ» ՍՊԸ-ն նույնպես ստեղծել է Վարդան Զաքարյանը՝ 2015թ.: Նա է ընկերության միակ սեփականատերը: ՍՊԸ-ն զբաղվում է ֆինանսական միջնորդությանն առնչվող օժանդակ գործունեությամբ` բացի ապահովագրությունից և կենսաթոշակային ապահովությունից:

«Հարվեստ» ՍՊԸ-ն 2016թ. փետրվարին ստեղծվել է Արաբական Միացյալ էմիրությունների քաղաքացու կողմից: Սակայն, մոտ մեկ տարի անց ընկերության միակ սեփականատերը դարձել է Վարդան Զաքարյանը: ՍՊԸ-ն իրականացնում է մանրածախ առևտրային գործունեություն:

Նույն գործունեությունն է իրականացնում նաև «ԳՐԻՆՊԱՐԿ» ՍՊԸ-ն: Վարդան Զաքարյանին ընկերությունն անցել է դարձյալ ԱՄԷ-ի քաղաքացուց՝ 2017թ. սեպտեմբերին: 2024թ. հունիսի 12-ից ՍՊԸ-ի վրա արգելք է դրված՝ ձեռնպահ մնալ ընկերությունում Վարդան Զաքարյանին պատկանող բաժնեմասի տնօրինման հետ կապված որևէ պետական գրանցումից:

Հայաստանում 2018թ. իշխանափոխությունից հետո՝ 2019թ. նոյեմբերին, Վ. Զաքարյանը հիմնել է նոր ընկերություն՝ «100 տարի» ՍՊԸ-ն: Ըստ հարկային մարմնում հրապարակված տեղեկատվության` ընկերությունը սննդամթերք է արտադրում:

Վարդան Զաքարյանին է պատկանում «Ծաղկաձորի սպորտ կոմպլեքս» ՍՊԸ-ն: Ընկերությունը հիմնվել է 2021թ. հոկտեմբերին՝  Վ. Զաքարյանի աներոջ՝ Արմեն Ադամյանի կողմից: Սակայն, 2022թ. հուլիսին ընկերության միակ սեփականատեր է դարձել Վարդան Զաքարյանը: Ընկերությունը Ծաղկաձոր քաղաքում մատուցում է հյուրանոցային ծառայություններ և մարզական հավաքների ժամանակ պարբերաբար մասնակցում է պետական գնումներին:

2023թ. հուլիսին էլ ստեղծվել է «Անտառում» ՍՊԸ-ն, որի 50%-ը պատկանում է Վարդան Զաքարյանին, իսկ մյուս կեսը՝ քրոջ ամուսնուն՝ Խաչատուր Սաֆարյանին: Ընկերությունն իրականացնում է ռեստորանային գործունեություն»,- ասվում է հոդվածում: