Ձեր վստահելի աղբյուրը

«Բագրատ արեքպիսկոպոս Գալստանյանի առաջնորդած «Տավուշը հանուն հայրենիքի» շարժումը ոչ միայն չի մարել, այլ հաղթել է, մնում է  հաղթանակն իրավական դաշտում հաստատվի»,- Panorama.am-ի հետ զրույցում ասաց  բանաստեղծ Արա Հուսիկը։

Նա ընդգծեց, որ այս շարժումը չի կարող չհաղթել. «Մենք քաղաքականապես հասել ենք այնպիսի փուլի, երկիրն այն անդունդի եզրին է, որ այս շարժումը չի կարող պարզապես չհաղթել։ Կարող է այսպես ձգվել մեկ, երկու ամիս, բայց շարժումը վերջնական կհասնի այն հանգրվանին, որ իրավական տեսակետից էլ հաղթանակած դուրս կգա, այսինքն խորհրդարանով Սրբազան հայրը վարչապետ կընտրվի։ Այլ տարբերակ, ճանապարհ չկա։

Սա մեր վերջին հնարավորությունն է։ Սրանք հեշտ գնացող չեն, էլի վայրագություններ են անելու, արյունահեղություն, բայց  որևէ մեկիս չպետք է վախեցնի, քանի որ այլընտրանքը՝ Հայաստանին սպասվում է Արցախի ճակատագիրը։

Չենք կարող այս փոքրիկ, վերջին պատառ հողի վրա ցեղասպանվենք, ոչնչանանք, կորցնենք մեր պետությունն ու պետականությունը։  Վերջին պահին ենթագիտակցորեն կամ գիտակցորեն ազգը դա թույլ չի տա»։

Հուսիկ Արան ընդգծեց՝  Շարժումը հաղթել է տարբեր դրվագներով և թելադրողը Սրբազանն ու ժողովուրդն է։

«Ժողովուրդը փակում է կառավարության շենքը, այդ օրը նիստ չի լինում։ Ժողովուրդը գնում է Սարդարապատի հուշահամալիր, պետական արարողակարգով հստատված ժամը խախտվում է, Փաշինյանը գնում է Սարդարապատ ավելի ուշ, երբ Սրբազանն ու ժողովուրդն արդեն այնտեղ չէին»։

Մտավորականը կարևորում է այն, որ Բագրատ Սրբազանը կարողացավ համախմբել ժողովրդին ու «մայիսի 9-ին մենք Հանրապետության հրապարակում տեսանք ազգին»։

«Սրբազանը Գևորգ Մարզպետունու պես համախմբեց բոլորին։ Նա կարողացավ հակադիր քաղաքական ուժերի բերել մի դաշտ։ Ես կանգնած եմ հրապարակում, իմ կողքին կանգնած են այնպիսի քաղաքական ուժերի ներկայացուցիչներ, որոնց ուղղակի տանել չեմ կարողանում։ Բայց բոլորս լուռ, համերաշխ, համախոհ կանգնած ենք, քանի որ զոհասեղանին դրված է Հայաստանը, Հայաստանի փրկության հարցը։

Սրբազանը շատ բան կարողացավ անել՝ ատելությունը հանել, համերաշխության օրակարգ բերել։
Ամեն ինչ շատ հավասարակշռված անում է։ Քաղաքական մեծ փորձ ունեցողները երևի թե այդքան չէին կարող անել, ինչքան արեց ու անում է Սրբազանը։

Ես հավատում եմ, վստահում եմ Սրբազանին։ Ժողովրդի մեջ նա վստահությունը վերականգնեց։

Ընդդիմադիր, իշխանական ուժերը սպառել են իրար, մենք խայտառակ, քաղաքականապես սնանկ վիճակում են։ Նորմալ ընդդիմության չկա, որին ժողովուրդը վստահի, իշխանությանը չի վստահում։ Ու այս ամենի մեջ եկավ մեկը, ում ժողովուրդը վստահեց։ Դա նաև Սրբազանի անցած ճանապարհից է գալիս. կանգնել է խրամատում զինվորի կողքին, ինքնաձիգն ուսին, խաչը կրծքին։ Իր կենսագրությունը, կերպարը մեծ դեր խաղաց»,- ասաց Հուսիկ Արան։

Նա վստահ է նաև, որ այս իշխանությունը երկար չի կարող մնալ. «Այս իշխանությունը պարտված է, ինչը ցույց տվեց հունիսի 12-ին ժողովրդի վրա նռնակներ նետելը. ժողովրդի վրա նռնակ նետողը երկրում  իշխանություն չունի։

Նիկոլ Փաշինյանը, ՔՊ-ականներն իշխանություն չունեն, ուղղակի լկտիաբար կառչել են աթոռներից, միջնադարյան բռնապետի նման կառչել են իշխանությանը։ Սպառված իշխանություն է։ Այս ամբողջն աշխարհը տեսնում է, ձայն չեն հանում, քանի որ Արևմուտքին ձեռք է տալիս  Փաշինյանի հայտարարությունները ՀԱՊԿ-ից դուրս գալու և այլնի մասին»։

(Գլխավոր լուսանկարը՝ Հուսիկ Արայի էջից, լուսանկարիչ՝ Արմեն Ափոյան)