Ձեր վստահելի աղբյուրը

 «Սուրեն Պետրոսյանի հետ մենք ճանապարհ ենք անցել, աշխարհի ճանապարհը։ Հասել ենք մի հանգրվանի, որտեղ մենք որոշումներ ենք կայացնելու։ Այս պահին այդ ճանապարհները բաժանված չեն, բայց մենք որոշումներ կկայացնենք միասին՝ կբաժանվեն, թե չեն բաժանվի»,- Տավուշի մարզ այցի ժամանակ լրագրողներին ասաց «Տավուշը հանուն հայրենիքի» շարժման առաջնորդ Բագրատ արքեպիսկոպոս Գալստանյանը։

Սրբազանը նշեց, որ երեկ հանդիպել ու խոսել է Սուրեն Պետրոսյանի հետ։

Հարցին՝ պնդումները, որ Սուրեն Պետրոսյանին առևանգել են, փաստեր ներկայացվե՞լ են, Սրբազանն ասաց. «Ես երեկ նորից կրկնել եմ՝ եթե այդ դրվագը կա, լավ կլինի որպեսզի դիմեն համապատասխան մարմինների։ Ինքը խոսել է փաստաբանների հետ։

Ես չեմ ուզում որևէ մեկի անմեղության կանխավարկածի վրայով անցնել, չեմ ուզում մարդկանց խոսքերին չհավատալ, իմ բնույթն այդպիսին չէ։

Իմ ճանապարհը ճանապարհ է, ով կմիանա այդ ճանապարհին, թող միանա, կամ ճանապարհից կորոշի, որ լավ ճանապարհ չէ, ինքը գիտի։ Իմ կյանքն այդպես է, մնացածն իմը չէ։ Ես շատ դժվար եմ մարդկանց իմ կողքից հեռացնում, գրեթե չեմ էլ հեռացնում»։ 

Հարցին՝ ի՞նչ եք կարծում, ԱԱԾ-ն է ներգրավե՞լ, որ Շարժման ներսում պառակտում մտցնի, Սրբազանն ասաց. «Միգուցե»․

Հիշեցնենք, որ հունիսի 12-ին Բաղրամյան պողոտայում բախումներին ընդառաջ հայտարարվել էր «Տավուշը հանուն հայրենիքի» շարժման նախաձեռնողներից, Ժողովրդավարական համախմբում կուսակցության նախագահ Սուրեն Պետրոսյանին առևանգելու մասին։ Սուրեն Պետրոսյանը երկու անգամ հանդես է եկել հայտարարությամբ, ինչից հետո ավելի շատ հարցեր են առաջացել և նա ասուլիսը հրավիրել էր հենց այդ հարցերին պատասխանելու համար։