Ձեր վստահելի աղբյուրը

Կառավարության որոշմամբ Գ. Սունդուկյանի անվան ազգային ակադեմիական թատրոնին միավորված «Գոյ» թատրոնի դերասաններից որևէ մեկը դեռ չի ընդունվել աշխատանքի մայր թատրոնում։

«Եթե կգան, կուզեն աշխատել, բարով գան, տեղ կա, կարող են գալ, մեր մասով որևէ խնդիր չկա»,- Panorama.am-ի հետ զրույցում ասաց Գ. Սունդուկյանի անվան ազգային ակադեմիական թատրոնի տնօրեն Վարդան Մկրտչյանը։

Հիշեցնենք, որ կառավարության որոշմամբ «Գոյ» թատրոնը միավորվել է Գ. Սունդուկյանի անվան ազգային ակադեմիական թատրոնին, սակայն «Գոյ» թատրոնի դերասանական ու ստեղծագործական կազմը դեմ է այդ միավորմանը, ուզում են որպես առանձին թատրոն հանդես գալ։ «Գոյ» թատրոնը  միավորման վերաբերյալ կառավարության որոշումը վիճարկում է դատարանում, նաև թատրոնի դերասանները, ստեղծագործական անձնակազմը բողոքի ակցիաներ է արել՝ իրենց դժգոհությունը փորձելով հասցնել ԿԳՄՍ նախարարություն, Գ. Սունդուկյանի անվան ազգային ակադեմիական թատրոնի տնօրինությանը։

Դատական գործընթացը դեռ շարունակվում է, իսկ բողոքի ակցիաներով հստակ որևէ արդյունք չգրանցելով՝ թատրոնի դերասանական ու ստեղծագործական կազմը որոշում է կայացրել հանդես գալ որպես անկախ թատրոն

«Գոյ» թատրոնի դերասան Աշոտ Տեր-Մաթևոսյանը Panorama.am-ի հետ զրույցում ասաց, որ որպես անկախ թատրոն հանդես գալու իրենց որոշումն ու ԿԳՄՍ նախարարության հետ ձեռք բերած համաձայնությունն ուժի մեջ է։

«Համաձայնեցված է նախարար Ժաննա Անդրեասյանի հետ մեկ-երկու ամիս առաջ հանդիպման ժամանակ։ Այժմ ընթացիկ աշխատանքներ են այդ ամենն իրականացնելու համար։ Առաջիկայում կրկին հանդիպում կունենանք նախարարի հետ՝ մանրամասն քննարկելու ու ավելի շոշափելի գործընթաց սկսելու համար։ Կարծում եմ՝ արդեն գործունեություն սկսելու ժամկետն այդ հանդիպման ժամանակ կհստակեցվի։

Ինչ վերաբերում է հարցին, թե որպես անկախ թատրոն «Գոյ»-ը որտեղ է հանդես գալու, Աշոտ Տեր-Մաթևոսյանն ասաց, որ որպես հնարավոր տարբերակ դիտարկվել է նաև այն տարածքը, որտեղ մշտապես հանդես են եկել՝ Սունդուկյան թատրոնի տարածքում գործող իրենց բեմում։

«Պայմանավորվածությունն այդպիսին է եղել, դիտարկվել է որպես հնարավոր տարբերակ, ու մենք այդ ուղղությամբ ենք աշխատում»,- նշեց նա։

Այժմ «Գոյ» թատրոնի դերասաններն անգործ են, քանի որ  միավորումից հետո, Աշոտ Տեր-Մաթևոսյանի փոխանցմամբ, Գ. Սունդուկյանի անվան ազգային ակադեմիական թատրոնի հետ որևէ դերասան պայմանագիր չի կնքել։

«Սունդուկյան թատրոնը երկու ամիս առաջ ծանուցել է բոլոր աշխատակիցներին, որ «Գոյ» թատրոնից ազատված են։ Միավորումից հետո պետք է լինի պայմանագրերի թարմացում, բայց մենք նոր պայմանագիր չենք կնքել Սունդուկյան թատրոնի հետ, քանի որ մեր նպատակն ուրիշ է»,- ասաց դերասան Աշոտ Տեր-Մաթևոսյանը։