Ձեր վստահելի աղբյուրը

«Հայաստանի պետական հետաքրքրությունների ֆոնդի՝ ԱՆԻՖ-ի լուծարման համար վաղ թե ուշ լինելու են պատասխանատուներ»,- Panorama.am-ի հետ զրույցում նման համոզմունք հայտնեց քաղաքագետ Արմեն Վարդանյանը՝ անդրադառնալով հիմնադրամի անփառունակ վախճանին։

Նշենք, որ երեկվա նիստում գործադիրը չզեկուցվող հարցերից մեկով որոշում է կայացրել 1,7 միլիարդ դրամ տրամադրել ԱՆԻՖ-ի պարտավորությունների մարման և 2024-ի պահպանման ծախսերի համար։

Civilnet-ը, որ հետևողական անդրադարձել է ֆոնդի շուրջ զարգացումներին, նշում է՝  1,7 միլիարդ դրամը կառավարությունը որոշել է հայթայթել ANIF-ի դուստր ձեռնարկությունից՝ «Ձեռնարկատեր+պետություն հակաճգնաժամային ներդրումներ» ֆոնդից։ Կառավարության որոշումից, դրա հիմնավորումներից պարզ չի դառնում, թե որքա՞ն է ANIF-ի պարտավորությունների ընդհանուր ծավալն ու ինչ գծով են այդ պարտավորությունները։

«Կառավարությունը հիմա ծածկադմփոց է անում։ Կարծում եմ, վերջում պարզվելու է տեղի ունեցածի գլխավոր պատասխանատուն Տիգրան Ավինյանն է, որը եղել է ԱՆԻՖ-ի տնօրենների խորհրդի նախագահը։ Հավանաբար չեն ուզում, որ յուրայինի նկատմամբ քրեական գործ հարուցեն, բայց կարծում եմ՝ վաղ թե ուշ դա լինելու է»,-ասաց Վարդանյանը։

Նա նկատեց՝ շատ բաներ ինքն էլ, հանրությունն էլ չգիտի, սակայն ինսայդերներից ստացած հավաստի տեղեկատվության հիման վրա կարող է ասել, ֆոնդում չարաշահումներ են եղել, չափազանց մեծ աշխատավարձեր են վճարվել, որոնք անհամարժեք են կատարած աշխատանքին։

«Նույնիսկ այդքանից հետո ձախողել են։ Ներդրումներ չեն կարողացել Հայաստան բերել։ Հիմնադրամը դարձել է որոշ մարդկանց կողմից իրենց ծանոթ-բարեկամներին բարձր աշխատավարձով աշխատանքի տեղավորելու միջոց։ Եթե այնտեղ ուսումնսիրություններ անցկացվեն, պարարտ հող է ահռելի չափով կոռուպցիոն գործեր բացելու համար։ Շքեղ պրոյեկտտների մասին էր վերամբարձ կերպով հայտարարվում, պարզվեց՝ դրանք բոլորն էլ ձախողվել են։ Որևէ մեկը տնտեսական առումով Հայաստանին օգուտ չի բերել»,-ասաց քաղաքագետը։

Հարգելով անձի անմեղության կանխավարկածը՝ Արմեն Վարդանյանը չի պնդում, որ Ավինյանը մեղավոր է ու պետք է դատվի, բայց ողջամիտ կասկածներ ունի, որ ֆոնդում տեղի ունեցածը եղել է նրա իմացությամբ։

«Մի քանի մլն դրամ արժեցող գործուղումներ են եղել, մարդիկ գնացել են այստեղ-այնտեղ ու ոչ մի բան չեն արել։ Իրականում այդ հիմնադրամը մարդկանց համար հանդիսացել է փող ուտելու տեղ, անարդյունավետ ծախսերի տեղ։ Ես լսել եմ, որ 1-1.5 մլն դրամ աշխատավարձեր են ստացել, երբ տեսնում ենք, որ մեր երկրում փրկարարը ստանում է մոտ 160 հազար դրամ»,-ասաց քաղաքագետը՝ ընդգծելով, որ պետք է իրավապահ, քննչական մարմինները լուջ աշխատանք կատարեն, հետաքննություն իրականացնեն՝ պարզելու, թե ինչպես ստացվեց, որ այդքան գումար ծախսելուց հետո հիմնադրամը նման անփառունակ վախճան ունեցավ։

Արմեն Վարդանյանը նաև նշեց՝ եթե գերբարձր աշխատավարձերի պարագայում ֆոնդի ոչ մի նախագիծ չի իրականացվում, ապա պետք է լինեն քրեական գործեր գումարների վատնման հիմքով։

«Ես վստահ եմ, եթե լինեն լուրջ քննչական գործողություններ, բավականին բաներ կբացահայտվեն։ Եթե իշխանությունը կոռուպցիայի դեմ պայքարը հայտարարում է իր գերակայություններից մեկը, այդ հարցին չպետք է մատերի արանքով նայի, իսկ հասարակությունը ողջամիտ կասկածներ ունի, որ ԱՆԻՖ-ում շատ լուրջ չարաշահումներ են եղել, այո, դրանց հետևից պետք է գնան քննչական մարմինները, ամեն ծախսը պետք է հիմնավորվի, եթե ոչ, ապա դրա համար միանշանակ պետք է լինեն պատասխանատվության ենթարկվողներ»,-ասաց նա։

Մանրամասները՝ ձայնագրությամբ։