Ձեր վստահելի աղբյուրը

Իրանում ընթանում են նախագահական ընտրություններ։ Թեկնածուները չորսն են՝  Մուստաֆա Փուրմուհամադի, Սաիդ Ջալիլի, Մոհամմադ Բաղեր Ղալիբաֆ, որոնք պահպանողական թևից են, բարեփոխական ճամբարի ներկայացուցիչ Մասուդ Փեզեշքիան։

Հայաստանում գտնվող Իրանի քաղաքացիները նույնպես կարող են իրենց ընտրությունը կատարել։ Երևանում երկու տեղամաս է բացվել՝ դեսպանատանը և Կապույտ մզկիթում: Նախատեսված է նաև մեկ շարժական քվեատուփ Իրանի այն քաղաքացիների համար, որոնք հիվանդ են կամ այլ տարբեր պատճառներով չեն կարող այցելել ընտրատեղամասեր։

ՀՀ-ում Իրանի դեսպանությանը Իրանի  արտակարգ և լիազոր դեսպան Մեհդի Սոբհանին իր ընտրությունը կատարելուց հետո լրագրողների հետ զրույցում ասաց. «Այսօր ճակատագրական օր է Իրանի ժողովրդի և Իրանի համար։ Այսօր Իրանի ժողովուրդն առաջիկա 4 տարվա համար ընտրում է  իր նախագահին։ Սա Իրանում անցկացվող 14-րդ նախագահական ընտրություններն են: Սա ցույց է տալիս, որ Իրանի կառավարությունը  հիմնված է Իրանի ժողովրդի քվեի, Իրանի ժողովրդի որոշման վրա:

Այսօր մենք քվեարկում ենք հանուն հզոր, առաջադեմ, երջանիկ ու զարգացած Իրանի»:

Դեսպանն ասաց, որ այսօր առավոտյան ժամը 8։00-ից սկսվել են ընտրությունները, Հայաստանում բնակվող Իրանի քաղաքացիները կամ զբսաշրջիկները, այցելում եմ և իրենց քվեն են տալիս, ինչը նշանակում է, որ Իրանի ապագան իրենց համար կարևոր է:

«Ես համոզված եմ, որ Հայաստանում շատ լուրջ հետևում են Իրանի ընտրություններին և լիահույս եմ, որ այսօր կունենանք այնպիսի արդյունք, որը ի նպաստ կլինի թե Իրանի ժողովրդին, իմ երկրին, թե  Իրան-Հայաստան երկկողմ հարաբերությունների զարգացմանը»,-ասաց դեսպանը:

Հարցին՝ Իրանի քանի՞ քաղաքացի է գրանցված Հայաստանում, որ պետք է մասնակցի ընտրություններին, Մեհդի Սոբհանին ասաց, որ իրենց ունեցած թիվն այն գործերի քանակի հետ է կապված, որոնք դիմել են իրենց հյուպատոսական բաժին. «Հստակ թիվ և տվյալ, թե քանի Իրանի քաղաքացի ունենք Հայաստանում, նաև  հաշվի առնելով զբոսաշրջիկները ելքը, մուտքը, հստակ  չեմ կարող ներկայացնել»։

Դեսպանը նշեց, ըստ Իրանի գործող օրենքի, ցանկացած իրանցի, աշխարհի որ երկրում էլ լինի, կարող է իր անձնագրով, ազգային քարտով ներկայանալ տեղամաս ու մասնակցել ընտրություններին։

«Դա հանգստի համար է արված։ Ենթադրենք, մի իրանցի գտնվում է  Հայաստանում ու հետ է վերադառնում Իրան, ճանապարհին կարող է Կապանում գլխավոր հյուպատոսություն դիմել ու այնտեղ քվեարկել։ Միգուցե սա  լավ փորձ կլինի և կարող եք դիտարկել»,- ասաց Հայաստանում Իրանի դեսպանը։