Ձեր վստահելի աղբյուրը

«Կապ չունի, թե ով կընտրվի Իրանի նախագահ։ Իրանի արտաքին քաղաքականությունը հատկապես Հարավային Կովկասում, Հայաստանի հետ էական որևէ փոփոխություն չի կրելու»,- Panorama.am-ի հետ զրույցում ասաց իրանագետ Արտյոմ Տոնոյանը։

Նա նշեց, որ պետության կառուցվածքով, համակարգով, առանձնահատկություններով պայմանավորված՝ կապ չունի, թե ով է պետության ղեկավարը։

Հիշեցնենք, որ նախօրեին Իրանում կայացել են արտահերթ նախագահական ընտրություններ։ Քանի որ թեկնածուներից ոչ մեկ չի հավաքել 50 տոկոսից ավելի ձայն, նախագահական ընտրությունների երկրորդ փուլ կանցկացվի։ Երկրորդ փուլում իրանցիներն ընտրություն կկատարեն բարեփոխիչների թեկնածու Մասուդ Փեզեշքիանի և պահպանողականների թեկնածու Սաիդ Ջալիլիի միջև։

Ա. Տոնոյանը նշեց, որ թեև քարոզարշավի ժամանակ թեկնածուներից Մասուդ Փեզեշկիանին պանթուրքիստ էին անվանում, դա զուտ քարոզչություն է։

«Հայաստանի հետ կապված Իրանի քաղաքականությունը չի փոխվելու։ Ընդհանրապես, Հարավային Կովկասի հատվածում էական փոփոխություն չի կրելու քաղաքականությունը, ուղղակի կապված բարեփոխիչ է, թե պահպանողական, հաճախ պահպանողականների ժամանակ Ադրբեջանի հետ վարվող քաղաքականությունն ավելի կոշտ է լինում, բարեփոխիչների ժամանակ ավելի հակված են լինում տնտեսական համագործակցության։ Զուտ այդքանով»,- ասաց իրանագետը։

Ինչ վերաբերում է երկրորդ փուլում երկու թեկնածուների հնարավորություններին, Ա. Տոնոյանն ասաց. «Իմ անձնական կարծիքով, ամենայն հավականությամբ, պահպանողական թեկնածուն կընտրվի, որը նաև ընտրություններից առաջ էր հիմնական թեկնածուն»։ 

Իրանում կայացած արտահերթ նախագահական ընտրություններից հետո 12 մլն 58 հազար 843 քվեաթերթիկ հաշվելուց հետո առաջատար է բարեփոխիչների թեկնածու Մասուդ Փեզեշքիանը՝ հավաքելով 5 մլն 354 հազար ձայն, այնուհետև Սաիդ Ջալիլին, ով հավաքել է 4 մլն 875 հազար 269 ձայն, Մոհամմադ Բաղեր Ղալիբաֆը՝ 1 մլն 620 հազար ձայն, Մուստաֆա Փուրմուհամադին՝ 95 հազար 172 հազար ձայն։