Ձեր վստահելի աղբյուրը

Թուրքիայի կենտրոնական Կայսերի (Կեսարիա) նահանգի Մելիքգազը շրջանի Դանըշմենթգազի թաղամասում մի խումբ մարդիկ հարձակվել էին սիրիացիներին պատկանող աշխատատեղերի և մեքենաների վրա:  Դա սկսվել էր այն բանից հետո, երբ հայտնի է դարձել, որ ծագումով սիրիացի տղամարդը 6-ամյա երեխայի նկատմամբ սեռական բռնություն է կիրառել։

Այս իրադարձությունների ֆոնին Սիրիայի տարածքում, որտեղ որ Թուրքիան իրականացրել էր «Եփրատի վահան» գործողությունը, սիրիացիները դիմել են պատասխան գործողություններրի՝ հարձակվելով թուրքական բեռնատարների, շենքերի և թուրքական անցակետի վրա, այրել և ապամոնտաժել Սիրիայի տարբեր շրջաններում տեղակայված թուրքական դրոշները:
Այս հարձակումներից հետո սիրիացիների դեմ արշավը տարածվել է Թուրքիայի տարբեր նահանգներում՝ պահանջելով արտաքսել բոլոր սիրիացի միգրանտներին։ 

ԳԱԱ Արևելագիտության ինստիտուտի նախկին տնօրեն, ակադեմիկոս, թուրքագետ Ռուբեն Սաֆրաստյանը Panorama.am-ի հետ զրույցում ասաց, որ ստեղծված իրավիճակն առաջին հերթին դիտարկում է արտաքին քաղաքական առումով։

«Սիրիայի տարածքի այն հատվածում, որ գրավված է թուրքական բանակի կողմից, սկսվել են բախումներ, սիրիացի բնակիչները հարձակվել են թուրքական ռազմական մեքենայի վրա, վառել թուրքական դրոշներ։

Ինչն է կարևոր ու հետաքրքիր, որ այդ հարձակումներին մասնակցում են ոչ միայն սովորական սիրիացիներ, որոնք Սիրիայի հյուսիսում հայտնվել են թուրքական իշխանության ներքո, այլ նաև այնպիսի իսլամիստական կազմակերպություններ, որոնք գտնվում են Թուրքիայի ազդեցության տակ։ Հիմա նրանք էլ են հակաթուրքական  ելույթներ ունենում։ Դժվար է կանխատեսել, թե ինչ շարունակություն դա կունենա»,- ասաց թուրքագետը։

Ինչ վերաբերում է Թուրքիայում սիրիացիների դեմ արշավին, Ռուբեն Սաֆրաստյանն ասաց, որ Թուրքիայում իսկապես խնդիրը լուրջ է։

«Սիրիացի փախստականները մեծ թիվ են կազմում։ Համոզված եմ՝ Թուրքիայում տեղի ունեցող բախումները նաև կօգտագործի ընդդիմադիր հիմնական  «Ժողովրդահանրապետական» կուսակցությունը, որը մշտապես քննադատել է իշխանություններին, որ մեծ թվով փախստականներ կան, որոնք պետությունից աջակցություն չեն ստացել և այլն։ Կարծում եմ՝ կփորձեն այդ բախումներն օգտագործել իրենց դիրքերն ուժեղացնելու համար։

Մյուս հանգամանքը. Եվրամիությունը Թուրքիային մեծ գումարներ է տրամադրել փախստականների համար սահմանամերձ շրջաններում հատուկ ճամբարներ կառուցելու համար։ Բայց Թուրքիան գումարները վերցրել է ու ոչինչ չի արել։ Դա իշխանությունների թերացումն է, զեղծարարություններ են տեղի ունեցել»,- նշեց նա։

Թուրքագետի կարծիքով, վերջիվերջո թուրքական հատուկ ծառայությունները, բանակը կճնշեն թուրք ազգաբնակչության և սիրիացիների միջև  բախումները։

«Բայց,  ամեն դեպքում, բախումները վկայում են այն մասին, որ Թուրքիայի ներքին քաղաքական կյանքում ամեն ինչ այնպես հանգիստ չէ, ինչպես փորձում են ներկայացնել իշխանությունները։

Տեսնենք՝ ինչ զարգացումներ տեղի կունենան»,- ասաց Ռուբեն Սաֆրաստյանը։