Ձեր վստահելի աղբյուրը

Ինչպե՞ս կանդրադառնան արևմտյան երկրներում  ընտրությունները Հայաստան-Ռուսաստան հարաբերությունների հետագա ընթացքի վրա, ինչի՞ մասին են վկայում Երևանում ԵՄ անդամակցության մասին Փաշինյանի հայտարարությունները։ Այս ու այլ հարցերի շուրջ Panorama.am-ը զրուցել է Պատմական գիտությունների թեկնածու, վերլուծաբան, APRI Armenia-ի գիտաշխատող Սերգեյ Մելքոնյանի հետ։

«Բոլորը գիտեն, թե ում առաջարկով  Ռուսաստանում Հայաստանի դեսպանը մեկնեց Բելգորոդ, բայց չեն ուզում ասել։ Այցը դիվանագիտական ռեակտիվ քայլ էր, պատասխան Ուկրաինայում մեր դեսպանի  Բուչա կատարած այցին»,-ասաց Սերգեյ Մելքոնյանը՝ ընդգծելով, որ ՌԴ-ում Հայաստանի դեսպան Վաղարշակ Հարությունյանի՝ վերջին օրերի այցերը Հայաստան-Ռուսաստան հարաբերությունների նոր օրակարգի հետ կապ չունեն։

Ինչ վերաբերում է Փաշինյանի այն հայտարարությանը՝ թե ինքը չգիտի ԵՄ-ում Հայաստանին սպասումե ն, թե ոչ, Մելքոնյանն ընդգծեց, Հայաստանում ԵՄ-ից բարձր ակնկալիքներ են ձևավորում, դա վերաբերում են առաջին հերթին անվտանգության երաշխիքներին։

«Արևմուտքում հասկանում են, որ իրենք ունակ չեն տրամադրել անվտանգության երաշխիքներ, հետևաբար երբ Հայաստանում տարբեր ուժեր ստեղծում են բարձր ակնկալիքներ, որոնք ԵՄ-ն չի կարող բավարարել,  իրենք մեսիջներ են ուղարկում՝ պետք չէ ժողովրդին սին հույսեր տալ։ Ռազմավարական վեկտորի հետ այդ հայտարարությունը կապ չունի, շտկումների հարց է»,-ասաց փորձագետը։

Անդրադառնալով Արևմուտքում՝ Ֆրանսիայում, ԱՄՆ-ում ընտրությունների արդյունքների հնարավոր ազդեցությանը Ռուսաստան-Հայաստան հարաբերությունների վրա, ապա Մելքոնյանը նշեց, եթե Ֆրանսիայում աջերը հաղթեն, ապա Ռուսաստանի դեմ ինչ-որ խնդիրների շուրջ պայքարելու կամքը կնվազի, քանի որ դա նրանց արտաքին քաղաքական առաջնահերթությունների թվում չէ։ Շատ միջազգայնագետներ էլ կանախատեսում են, եթե հաղթի Թրամփը, հետխորհրդային տարածքը որպես գոտի, որտեղ ԱՄՆ-ն պետք է պայքարի Ռուսաստանի դեմ ու այդ պայքարի համար ներդրումներ անի, էլ առաջնահերթություն չի լինի։

«Այն աջակցությունը, որ Հայաստանը ստանում էր  Արևմուտքից, գալիս է ոչ թե ընդդեմ Ադրբեջանի կամ Թուրքիայի, այլ ընդդեմ Ռուսաստանի, պրագմատիկ բիզնեսային ռազմավարություն։ Նրանք ներդնում են այնտեղ, որտեղ շահեր ունեն, իսկ շահերը կապված են Ռուսաստանի դեմ պայքարի հետ։ Հիմա եթե Թրամփը հաղթի, գուցե Ռուսաստանի դեմ հետխորհրդային երկրում պայքարելու պատրաստակամությունը կնվազի, բայց այստեղ կծագի Իրանի խնդիրը, մենք ուրիշ օրակարգի շուրջ խնդիրներ կունենանք»,-ասաց Մելքոնյանը։

Նրա խոսքով՝ այս պահին Հարավային Կովկասի տարածաշրջանը կանգնած է լուրջ փոփոխությունների շեմին՝ պայմանավորված Իրանում, Ադրբեջանում, ԱՄՆ-ում, ԵՄ-ում ընտրությունների արդյունքներով, այդ պատճառով էլ կանխատեսումներ անելը շատ բարդ է։

Մանրամասները՝ ձայնագրությամբ։