Ձեր վստահելի աղբյուրը

«Հայաստանի կողմից խաղաղության պայմանագիրը ստորագրելու մասով որևէ ձգձգում չկա»,- լրագրողների հետ հանդիպմանը հայտարարեց ՀՀ ԱԺ նախագահ Ալեն Սիմոնյանը:

«Մենք պատրաստ ենք այն ստորագրել, գնդակը գտնվում է ադրբեջանական կողմում»,- նշեց նա:

Ա. Սիմոնյանի խոսքով, Հայաստանը լիահույս է, որ գործընթացը հաջողության կհասնի:

Ասուլիսին ներկա ԱՄՆ Սենատի արտաքին հարաբերությունների հանձնաժողովի նախագահ, դեմոկրատ Բեն Քարդինն ասաց, որ ԱՄՆ-ն հետաքրքրված է ու ցանկանում է առաջ մղել խաղաղության գործընթացը Հայաստանի և Ադրբեջանի միջև, ակտիվ ներգրավված կլինեն այդ գործընթացում, աշխատում են գործադիր, օրենսդիր  ճյուղերի հետ, որպեսզի կարողանան արդյունավետ լինել ու ձայները լսելի դարձնել։

«Մենք ցանկանում ենք, որպեսզի խաղաղության համաձայնությունը հնարավորինս շուտ ստորագրվի»,- ընդգծեց ԱՄՆ սենատորը։ 

Ասուլիսին ներկա ԱՄՆ սենատոր Ռոջեր Ուիքերն ասաց, որ ԱՄՆ-ն ու իրենց դաշնակիցները պատրաստ են նպաստել Հայաստանի ու Ադրբեջանի միջև բանակցություններին։ 

«Հասկանում ենք, որ կան տարբեր դիրքորոշումներ։ Մենք պատրաստ ենք նպաստել, միջնորդել, բովանդակալի քննարկումներին այդ դժվարին, բարդ գործընթացի ընթացքում։ Մենք, անշուշտ, հասկանում ենք, որ Հայաստանի կառավարությունը, ժողովուրդն ունի իր դիրքորոշումը։

Մեր պետքարտուղարությունը, ԱՄՆ ներկայացուցիչը պետք է փորձեն օգնել բանակցային գործըթնացին, բայց լինեն պարզապես միջնորդ, նպաստեն, որ երկու կողմերը գան համաձայնության»,- ասաց ԱՄՆ սենատորը։