Ձեր վստահելի աղբյուրը

«Մենք այստեղ ենք՝ ցույց տալու, որ ձեր բարեկամն ենք և շնորհակալություն ենք հայտնում ժողովրդավարության ուղղությամբ ձեր բարեփոխումների համար»,- Երևանում ՀՀ ԱԺ նախագահ Ալեն Սիմոնյանի հետ համատեղ ասուլիսում ասաց   ԱՄՆ սենատոր, Սենատի արտաքին հարաբերությունների հանձնաժողովի նախագահ, դեմոկրատ Բեն Քարդինը:

Նրա խոսքով, Հայաստանը առաջատար է ժողովրդավարության ասպարեզում այս դժվարին տարածաշրջանում, ուզում է մեկ անգամ ևս ընդգծել Հայաստանի ու ԱՄՆ միջև ամուր կապերը:

«Մենք հասկանում ենք, որ այս պահին ձեր ամենամեծ մարտահրավերը հարևանների հետ հարաբերությունների կարգավորումն է, Ադրբեջանի հետ խաղաղության բանակցությունները: Մենք աջակցում ենք այդ համաձայնության կայացմանը: Մենք հասկանում ենք, որ կան խոչընդոտներ, մենք հասկանում ենք, որ Ռուսաստանը բարեկամ չէ Ադրբեջանի հետ համաձայնության գալու հարցում: Մենք հասկանում ենք մյուս այն խնդիրները, որոնց հետ պետք է գործ ունենալ»,-ասաց ԱՄՆ սենատորը:

Նա նշեց, որ իրենք ուզում են ամրապնդել Հայաստանի հետ գործընկերությունը, բայց այստեղ լինելով՝ տեսնում են անվտանգային մարտահրավերները, որոնք կան Հայաստանի համար. «Միջազգային աջակցությունը, որ կա ռազմական համատեքստում, ձեզ համար սահմանափակում է»։

«Ադրբեջանի կողմից Լեռնային Ղարաբաղում ագրեսիայի ու էթնիկ զտման հետ կապված՝  մենք հասկանում ենք, որ երկու երկրների միջև հարաբերութունների կարգավորումն անհրաժեշտ է, բայց պետք է լինի նաև հաշվետվողականություն՝ փախստականների առումով,  պետք է լինի մշակութային ժառանգության պահպանման հարցը։ Մենք կշարունակեն այս հարցերը, խնդիրներն ուշադրության կենտրոնում պահել:

Մենք ուզում ենք Հայաստանի ու Ադրբեջանի միջև մեծացնել կապերը անվտանգության, տնտեսական, քաղաքական ասպարեզներում։ Մենք կփորձենք ուղիներ վերհանել, որոնցով կարող ենք առավել խորացնել այն առաջընթացը, որ ունեցել ենք։ Այս գործընկերությունը կարևոր է ոչ միայն Հայաստանի, ԱՄՆ-ի, այլև ժողովրդավարական երկրկների համար»,- ասաց ԱՄՆ սենատորը։

Նա նշեց, որ խաղաղության  համաձայնագրի նպատակն այն պետք է լինի Հայաստանի համար, որ ռազմական հարձակումներ չլինեն, հայ ժողովուդրը վստահ լինի, որ  կարող է հանգիստ, խաղաղ ապրել, չկա ռազմական գործողությունների սպառնալիք։

«Սա նաև հարաբերությունների կարգավորում է, սահմանային անցկատերը կբացվեն, ինչը կարևոր է Հայաստանի համար ոչ միայն մարդկանց տեղաշարժի, նաև առևտրի նպատակով։  Սրանք են խաղաղության համաձայնագրի նպատակները»,- ասաց սենատորը։ 

Հիշեցնենք, որ հուլիսի 2-5-ը այցով Հայաստանում է ԱՄՆ սենատոր Ռոջեր Վիքերի գլխավորած երկկուսակցական կոնգրեսական պատվիրակությունը։ Պատվիրակության անդամներն այսօր հանդիպում է ունեցել ԱԺ նախագահ Ալեն Սիմոնյանի հետ, որից հետո կայացել է համատեղ մամուլի ասուլիս։