Ձեր վստահելի աղբյուրը

«Եթե այդքան ճշմարիտ էին, ինչո՞ւ մարդկանց չեն հանդիպել, որոնց կյանքն ուղղակիորեն կապված է այդ փշալարի հետ, մարդկանց ողբերգություններն ինչո՞ւ չեն ապրել»,-անդրադառնալով ՔՊ-ական պատգամավորների Կիրանց այցին Արագածոտնի մարզում հայտարարել է Բագրատ Սրբազանը։

Նա ընդգծել է.

«Ճորտության, ստրկության, ծառայամտության զգացումը դարձրել են ուրախության առիթ։ Հստակ կերպով գնացել են Ադրբեջանին ուղերձ հղելու, որ տես՝ ինչ հավատարիմ ենք քեզ, ասածներդ սրբորեն կատարում ենք»։

Հիշեցնենք, որ «Տավուշը հանուն հայրենիքի» շարժման առաջնորդ Բագրատ Սրբազանն այսօր այցով Արագածոտնի մարզում է, նա այցելել է Օշական, հանդիպել բնակիչների հետ, այցելել սուրբ Մեսրոպ Մաշտոց եկեղեցի՝ ստանալու մեծ սրբի օրհնությունը, ինչից հետո այցելել Բյուրական։
 

Արագածոտնի գյուղերի բնակիչների հետ հանդիպմանը Սրբազանը նշել է.

«Անվտանգությունը մի ամբողջական համալիր է։ Երբ ասում եք անվտանգային խնդիր, մի պատկերացրեք միայն սահմանագծի անվտանգությունը։ Այո, դա մեր ֆիզիկական անվտանգության մասին է, որն առաջնային ու կարևոր է։ Բայց կա նաև հոգևոր անվտանգություն, պարենային անվտանգություն։

Եթե չկա հոգևոր անվտանգությունը, սահմանը ոչ ոք չի պահելու, որովհետև արժեքի հետ է կապված։ Զուտ խրամատի համար մարդիկ կյանքները չեն զոհում»։