Ձեր վստահելի աղբյուրը

«Լրիվ հորինվածք է, որտեղի՞ց են վերցրել, ես չգիտեմ։ «Բազումք»-ը որևէ առարկություն, դժգոհություն չի ստացել»,-Panorama.am-ի հետ զրույցում ասաց «Հայասաթ-1» թիմի գլխավոր գիտնական,  «Բազումք» տիեզերական հետազոտությունների լաբորատորիայի տնօրեն Ավետիք Գրիգորյանը։

Նրա խոսքով, «Բազումք»-ն արբանյակը տիեզերք ուղարկելու համար ստացել է Հեռահաղորդակցության Միջազգային Միության (ITU) թույլտվությունը, ուղեծիրն ու հաճախային տիրույթը, ըստ դրա էլ՝ արձակումը եղել է։

«Դրանից հետո որևէ բողոք որևէ կողմից մեզ հղված չի եղել, ես չգիտեմ, կարող է նախարարությանն է եղել, թող նախարարությունն ասի։ Մենք նախարարության հետ միշտ կապի մեջ ենք, ոչ մի անգամ չեն ասել, որ դա ինչ-որ խնդիրներ է առաջացնում։ Հայասաթ-1 արբանյակը թռել է՝ նախապես թույլտվություն ունենալով»,-ասաց Գրիգորյանը՝ հիշեցնելով, որ օրինակ «Արմսաթ-1»-ը թռել է, նոր փաստաթղթային հարցերը կարգավորվել են։

Հիշեցնենք,  որ այսօր մամուլը գրել էր՝ Բարձր տեխնոլոգիական արդյունաբերության նախարարի տեղակալ Ավետ Պողոսյանի անակնկալ պաշտոնազրկումը, կարծես թե, խոր արմատներ ունի:

«Ըստ կառավարությունից մեզ հասած լուրերի, երբ «Հայասաթ-1» արբանյակը ԱՄՆ-ի «Վանդենբերգ» ավիաբազայից ուղարկվել է տիեզերք SpaceX ընկերության Falcon-9 հրթիռով, ապա նաև «Արմսաթ-1»-ը, խնդիր են դարձել ոլորտի համակարգող Պողոսյանի համար:

Բանն այն է, որ ըստ տարբեր մասնագետների՝ տիեզերք ուղարկված արբանյակները այլ երկրների արբանյակների գլխին պատուհաս են դարձել, խափանել շատ երկրերի արբանյակների կամ դրանց ծրագրերի մի մասի գործունեությունը: Եվ ահա, ՀՀ վարչապետ Նիկոլ Փաշինյանին նամակներ են հղել տարբեր երկրների (ցանկը ճշտվում է, ավելի ուշ կհրապարակենք) կառավարություններից, հորդորել են հետ իջեցնել արբանյակը/ները, քանի որ ոչ պրոֆեսիոնալ և չհաշվարկված է եղել աշխատանքը, որակը և մեկնարկը»,-գրել է «Հրապարակ»-ը։

«Ոչ մի նման ինֆորմացիա մեզ չի եկել»,-կրկնեց Գրիգորյանը՝ չբացառելով այն, որ մի քանի երկրներ, հնարավոր է, միջազգային կարգավորող մարմին հայտնած լինեն, որ դա խնդիրներ է առաջացնում իրենց արբանյակների համար, սակայն ITU-ն է որոշում՝ հաշվի առնե՞լ այդ մտահոգությունները, թե՞ ոչ։ 

Նրա խոսքով, իրենք այսօր էլ ուսումնասիրում են «Հայասաթ-1»-ի ռեժիմները,  կապ են հաստատում, ինֆորմացիա ստանում, վերլուծում, այդպիսով նաև փորձ են կուտակում։

«Դա տեխնիկական դեմո էր, այսինքն, մենք ստուգում էինք, մենք մեր մասնագետներով, ուժերով կարո՞ղ ենք արբանյակ ստեղծել, թե՞ ոչ։ Մենք դա ընդամենը ստուգում էինք, մենք չէինք ստեղծում արբանյակ գիտական հետազոտության, կարևոր կիրառական ֆունկցիայի համար, չէր կարող այդ փոքր արբանյակն այդքան ֆունկցիոնալություն ունենալ։ Այն տեղեկությունները, որ մենք ստանում ենք, մեզ համար կարևոր են։ Բայց երբ ասում ենք կարևոր, մարդիկ ասում են՝ կլինի՞ դրանով լար գցել, Ալիևի վզից կապել, քաշել տիեզերք։ Մտածում են, եթե այդ պահին Ադրբեջանի գլխին չի խփում, ուրեմն ոչ մի բանի պետք չի։ Դրանք ուղղակի շատ ծիծաղելի պատկերացումներ են»,-ասաց նա։

Մանրամասները՝ ձայնագրությամբ։