Ձեր վստահելի աղբյուրը

ԱԺ Պաշտպանության և անվտանգության հարցերի մշտական հանձնաժողովի նիստին «Հայաստան» խմբակցության պատգամավոր Գեղամ Մանուկյանը «Պետական սահմանի» մասին օրենքից մեջբերում արեց, ըստ որի՝ օրենքում հստակ արձանագրված է սահմանային գոտի և սահմանայի շերտ։ Մասնավորապես նա նշեց, որ սահմանային գոտին մինչև 5 կմ լայնությամբ է, սահմանային շերտը՝  մինչև 1 կմ լայնությամբ, ընդ որում՝ սահմանային շերտի դեպքում կան սահմանափակումներ. օրինակ՝ արգելվում է  ոգելիչ խմիչք օգտագործել, իրենց հետ վերցնել զենք, ընտանի կենդանիների արածեցման, առևտրային գործունեության ծավալման սահմանափակումներ են գործում և այլն։

«Կիրանցում անցկացված փշալարերից մոտ 15 մետր այն կողմ տուն է։ Համաձայն օրենքի, դա դիտվում է  որպես սահմանային շերտ։ Ո՞նց եք պատրաստվում կանոնակարգել, որպեսզի Կիրանցի բնակիչների ամբողջական կենսագործությունը չխաթարվի, քանի որ համաձայն այս օրենքի, պայմանական Կիրանցի այս բնակչի տանը եթե որևէ առիթ լինի, չեն կարող ոգելիչ խմիչք օգտագործեն կամ որոշի 24-ժամյա խանութ բացի, ինչն արգելվում է։ Այսինքն ամբողջությամբ խաթարվելու է Կիրանցի բնակիչների բնականոն կենսագործունեությունը»։

Նիստին ներկա ԱԱԾ տնօրենի տեղակալ Անդրանիկ Սիմոնյանն ասաց, որ հարցին չի կարող խորքային առումով պատասխանել, եթե հետևողականորեն ցանկանում է ստանալ հարցի պատասխանը, պատգամավորը կարող է գրավոր հարցում ուղարկել, մանրամասն կպատասխանեն։

Մանուկյանն ասաց. «Իրավաբան չեմ, բայց կարդում եմ տեքստը, հասկանում եմ՝ մինչև 1 կմ գործում է  սահմանային շերտ, որը բնակիչներին բավականին սահմանափակումների է ենթարկում։ Անպայման հետևողականորեն կլինեմ,  որովհետև այս ընթացքում ինչ բարձրաձայնում էինք, կոնկրետ մեկ օրինակով ասում եմ, թե ինչպես է խաթարվում Հայաստանի քաղաքացու, Կիրանցի բնակչի  ամբողջական կենսագործունեությունը»։