Ձեր վստահելի աղբյուրը

Շենգավիթի վարչական շրջանի Շարուրի փողոցում խայտառակ վիճակ է։ Բանն այն է, որ այստեղ է գործում   «Արարատ» սննդի կոմբինատ ընկերությունը («Կարոլինա գրուպ»), որն այս օրերին ծիրան է ընդունում։ Մրգով լի բեռնատարներից հյութը թափվում է ու հոսում փողոցով։

Panorama.am-ի խմբագրություն դիմած քաղաքացիները բողոքում են, որ փողոցով քայլել չեն կարողանում, կոշիկները կպնում են ասֆալտին, բայցի այդ այս շոգի պայմաններում տհաճ հոտ է տարածվում։

«Ընկերությունը բարեխիղճ տնտեսվարողի վարք չի ցուցավերում, չի լվանում փողոցները, ինչի հետևանքով մեր կյանքը դժվարացել է։ Մայթերի կողքով երբեմն շիրայի առվակներ են հոսում։ Եթե նման վերաբերմունք է ցուցաբերում ընկերությունը այստեղ ապրող, աշխատող մարդկանց նկատմամբ, և դա իրենց համար նորմալ է, ապա կարելի է  ենթադրել, թե ինչ պայմաններում են պատրաստում հյութերն ու այլ պահածոները»,-ասաց խմբագրության զանգահարած քաղաքացին, որ Շարուրի փողոցի բնակիչ է։

Քաղաքացին նաև լուսանկարներ է ուղարկել, որոնք հավաստում են խնդրի առկայության մասին։

«Կարոլինա գրուպ» ընկերության տնօրեն Սարգիս Թարվերդյանի օգնականը Panorama.am-ի հետ զրույցում ընդունեց՝ քաղաքացիներն իրավունք ունեն բողոքելու, խնդիրն իսկապես առկա է։

«Այն աշխատակիցը, որ զբաղվել է նման հարցերով, պարզապես վատառողջ է եղել, գործին, այսպես ասած, ճիշտ ընթացք չի տվել։ Բայց այսօր՝ հենց հիմա այդ հարցերը լուծվում են։ Կներեք, որ նման բան է ստացվել»,-ասաց Թարվերդյանի օգնականը՝ Զառան։

Հետաքրքիր է, այս ընթացքում ընկերության տնօրենը, այլ պատասխանատուները, աշխատակիցներն այդ հատվածով չե՞ն անցել, փողոցի վիճակը չե՞ն տեսել, որ ընկերությունը քայլեր է խոստանում ձեռնարկել միայն բնակիչների՝ ԶԼՄ-ին դիմելուց հետո։