Ձեր վստահելի աղբյուրը

«Վրաստանի տարածքի թունելները շատ լուսավոր են, գալիս ենք՝ Դիլիջանի թունելը մթության մեջ է»,- ԱԺ ֆինանսավարկային և բյուջետային հարցերի մշտական հանձնաժողովի նիստում ասաց ՔՊ-ական պատգամավոր Նարեկ Գրիգորյանը՝ դիմելով տարածքային կառավարման և ենթակառուցվածքների նախարարի տեղակալ Քրիստինե Ղալեչյանին։

Փոխնախարարն ասաց, որ ոչ միայն լուսավորության խնդիր կա, նաև հրդեհային, տարհանման համակարգերի և մի շարք այլ խնդիրներ. «Մենք պարտավորվել ենք, որ ներդնելու ենք Եվրոպական միության թունելների անվտանգության պահանջները, այդ թվում լուսավորության և մնացած անվտանգային միջոցառումների մասով այլ պահանջներ են սահմանում, այլ փոփոխություններ պետք է անենք։

Վարձել ենք միջազգային խորհրդատվական ընկերություն, որը կատարել է  համալիր ուսումնասիրություն և առաջարկել է լուծումներ: Այդ թվում լուսավորությունը պետք է վերանայվի և համապատասխանեցվի անվտանգության բարձր պահանջների»։

Նա տեղեկացրեց, քանի որ Դիլիջանի թունելի վերականգնման աշխատանքների արժեքը բավականին բարձր է լինելու և նոր թունելի կառուցումն էլ արժեքով գրեթե մոտ է լինելու, այդպիսի վերլուծությունը ցույց տվեց, որ գործող թունելը կարող է օգտագործվել որպես տարհանման թունել կամ երթևեկությունը ընդլայնող, նոր թունելի կառուցումը նոր ստանդարտներով շատ ավելի նպատակահարմար է և ճանապարահային ենթակառուցվածքի զարգացան տեսանկյունից հիմնավորված, քանի որ այդ հատվածում երթևեկության ինտենսիվությունը շատ բարձր է: