Ձեր վստահելի աղբյուրը

«Արդյո՞ք այս ամեն ինչից հետո այդ պատկերացումն ունեք, որ այդ մարմիններն էլ են թերացել աշխատանքում և նրանց աշխատանքի թերացումն էլ կա։ Մենք հիմա վերցնում ենք նորից նույն մեթոդով համակա՞րգ լինի, թե՞ ավելի ճիշտ է նոր կադրեր վերցնենք, նոր ՀՀ ազգային անվտանգության գիտակցությամբ, ՀՀ պաշտպանության, պետության կարևորության գիտակցմամբ, թե՞ 30 տարվա գիտակցությամբ ենք շարժվելու»,-ԱԺ-ում ԱԱԾ տնօրենի տեղակալ Անդրանիկ Սիմոնյանին հարցրեց ՔՊ-ական պատգամավոր Խաչատուր Սուքիասյանը։

Սիմոնյանը մինչ այդ զեկուցեց «Ազգային անվտանգության մարմիններում ծառայության մասին» օրենքում փոփոխություններ մտցնելու մասին օրինագիծը, որով հնարավորություն է տրվելու ԼՂ ԱԱԾ աշխատակիցներին աշխատանքի անցնել Հայաստանի Հանրապետության համապատասխան կառույցում։

Օրինագծի հիմնավորման մեջ ասվում է, որ եթե պետական լիազոր մարմնում թափուր պաշտոն հայտնվի, ապա 2023 թվականի սեպտեմբերի 19-ի դրությամբ Լեռնային Ղարաբաղի Ազգային անվտանգության ծառայությունում պաշտոններ զբաղեցրած անձանց պետք է հնարավորություն տրվի շարունակել ծառայությունը։

Պաշտոն նշանակելիս հաշվի են առնվելու ինչպես Լեռնային Ղարաբաղում աշխատանքային ստաժը, այնպես էլ զբաղեցրած պաշտոնը, ինչպես նաև կոչումները։ Օրենքը տարածվելու է 2023 թվականի սեպտեմբերի 19-ի դրությամբ ԼՂՀ Ազգային անվտանգության ծառայությունում պաշտոն զբաղեցրած և լիազոր մարմնում մինչև 2025 թվականի հուլիսի 1-ը պաշտոնավարած անձանց վրա։ Այսինքն՝ ներդրված հավելումը լինելու է ժամանակավոր՝ մինչև 2025 թվականի հուլիսի 1-ը, որից հետո այն կդադարի գործել։

«Սակայն այդ հնարավորությունից կկարողանան օգտվել միայն Հայաստանի Հանրապետության քաղաքացիություն ընդունած անձինք»,-ասաց Սիմոնյանը։