Ձեր վստահելի աղբյուրը

Վեդի խոշորացված համայնքի Գինեվետ բնակավայրում հուլիսի 10-ին Վեդիում ցեմենտի գործարանի կառուցման աղմկահարույց նախագծի շուրջ 4-րդ հանրային լսումներն իրականացնելու համար ՏԻՄ-ը չի ապահովել բավարար պայմաններ՝ բոլոր շահագրգիռ կողմերի պատշաճ ներգրավման համար։ Նման պնդում են անում բնակիչներն ու հասարակական սեկտորի ներկայացուցիչները։

Կարմիր սարը, որի մոտ է հանքը, գտնվում է Վեդի համայնքի կազմում գտնվող Գինեվետ ու Արտաշատ համայնքի կազմում գտնվող Այգեզարդ գյուղերի տարածքում։

«Չորրորդ հանրային լսման մասին իմացել եմ պատահաբար Շրջակա միջավայրի նախարարության կայքից, երբ ուսումնասիրում էի այդ ընկերության կողմից ներկայացրած նյութերը»,- «Չհանրային լսումներ Վեդի համայնքի Գինեվետ բնակավայրում» թեմայով քննարկման ժամանակ ասաց  Այգեզարդ գյուղի նախաձեռնող խմբի համակարգող Արփինե Խաչատրյանը։

Նա նշեց, որ հանքի բացմանը դեմ են Այեգազարդ գյուցի բնակիչների գերակշռող մասը, դրա մասին են վկայում հավաքած ստորագրությունները։

«Մենք չէինք կարող այդ հանքի շուրջ զարգացումներին անտարբեր մնալ։ Դիմեցինք նախարարություն, ասեցին՝ որպես շահագրգիռ կողմ կարող եք մասնակցել Գինեվետ գյուղում կայանալիք հանրային լսումներին»,-ասաց Խաչատրյանը։

Նրա խոսքով, պատրաստվել են միջոցառմանը, ցուցապաստառներ են պատրաստել, բնակիչների հետ Գինեվետ են գնացել։ Մտել է դահլիճ, որը գրեթե դատարկ է եղել, ապա լրագրողներից մեկի խնդրանքով դուրս է եկել՝ հարցազրույց տալու, րոպեներ անց ոստիկանները փակել են դուռը, թույլ չեն տվել ներս մտնել՝ պատճառաբանելով, որ դահլիճում տեղ չկա։

«Սա բացահայտ խտրականություն է, կոնվենցիայի խախտում։ Ովքեր դեմ էին, ներս չթողեցին, ովքեր կողմ էին կամ անտարբեր, թույլ էին տալիս մտնել դահլիճ»,-ասաց Խաչատրյանը։

Գինեվետ բնակավայրի բնակիչ Վարդուհի Բարսեղյանն ասաց՝ ապրում է գյուղի ծայրամասում,  իրենց տունը շատ մոտ է նախատեսվող հանքի տարածքին, սակայն հանրային լսումների մասին իմացել է շատ պատահական։ Բնակիչները տարակուսել են՝ տեսնելով, որ գյուղում այդ թվով ոստիկաններ են բերվել։

«Ես ընտանիքիս հետ եղել եմ այնտեղ, ինձ ոստիկաններն ասացին՝ փակ քննարկում է։ Ասեցի, որ հանրային լսում է։ Հետո պատճառաբանեցին՝ տեղ չկա, շոգ է։ Ակնհայտ է, որ տեսան՝ մենք դեմ ենք, թույլ չտվեցին ներս մտնել ու մեր դեմ կարծիքները հնչեցնենք»,-ասաց Վարդուհին։

«Հանրային վերահսկողություն» ՀԿ-ի նախագահ, Վեդի համայնքի բնակիչ Մհեր Կարագյոզյանը նկատեց՝ մի շարք ապօրինություններ են տեղի ունեցել, կոպիտ կերպով խախտվել են քաղաքացիների իրավունքները։

«Ներկա է եղել առնվազն 30 ոստիկան։ Սա հերթական դեպքն է, երբ ոստիկանների ուղիղ միջամտությամբ չի իրացվում մարդու իրավունքը։ Սա հանրային լսումներ չէին, դահլիճ թողնում էին այն քաղաքացիներին, որոնք կողմ էին հանքի բացմանը։ Երբ ես ներս մտա, ոչ մեկ չգիտեր՝ ես դե՞ եմ,  թե՞ կողմ։ Ինձ ասացին, առանց գրանցվելու ելույթ ունենալ չեմ կարող»,-ասաց Մհեր Կարագյոզյանը։

Նա լսումների ընթացքում արտահայտվելու հնարավորություն չի ունեցել։

«Մենք չունենք վստահություն, որ նոր բացվող հանքը կբերահսկվի պետության կողմից, չի խախտի լիցենզիայով ստանձնած պարտավորություններտ։ Ես սա պետք է հայտարարեի։ Ես տեղեկացա, որ հանքը շահագործել պատրաստվող ընկերությունը Վեդու համայնքապետարանի հետ հուշագիր է ստորագրել, որ շահույթի 10 տոկոսը պետք է գնա Վեդու Բյուջե, ինչը հանցագործություն է։ Եթե դու չես ունեցել հանրային լսումներ, թույլտվություն և 10 տոկոսով շահագրռել ես ինչ-որ ՊՈԱԿ-ի, աստեղ կան առերևույթ հանցանշաններ, ինչով պետք է զբաղվի դատախազությունը։ Պետք է լինեն պատժվողներ, քրեական վարույթներ, չորրորդ հանրային լսումները պետք է չեղարկվեն»,-ասաց նա։