Ձեր վստահելի աղբյուրը

Քաղաքացիական անվտանգության, ժողովրդավարության և մարդու իրավունքների հարցերով ԱՄՆ պետքարտուղարի տեղակալ Ուզրա Զեյան Հայաստանում է։ Նա Թբիլիսիից ժամանել է Երևան։

«Ողջույն Հայաստանից»։ Հայաստան ժամանելուն պես ուրախ էի հանդիպել Հայաստանում ԱՄՆ դեսպան Քրիստինա Քուինի հետ:

Ակնկալում ենք ամրապնդել համագործակցությունը կառավարության և քաղաքացիական հասարակության գործընկերների հետ՝ խթանելու ժողովրդավարական օրենքի գերակայությունը, կոռուպցիայի դեմ պայքարը և դատական բարեփոխումները»,- X-ի իր միկրոբլոգում գրել է նա:

ԱՄՆ դեսպանությունից հայտնում են, որ Լոռու մարզում պետքարտուղարի տեղակալ Զեյան այցելել է Հաղպատի միջնադարյան վանական համալիր՝ ծանոթանալու Հայաստանի հարուստ մշակութային ժառանգությանը։ «Մշակութային և կրոնական ժառանգության պահպանումը անչափ կարևոր է»,- նշում են դեսպանությունից

«Այս վանքի նման վայրերի պահպանումը կարևոր դեր է խաղում ապագա սերունդների համար պատմությունը վերապատմելու գործում»,- X-ում գրել է Ուզրա Զեյան:

Հիշեցնենք, որ ԱՄՆ պետքարտուղարի` Քաղաքացիական անվտանգության, ժողովրդավարության և մարդու իրավունքների հարցերով տեղակալ Ուզրա Զեյան 2024 թվականի հուլիսի 9-17-ը կլինի Վրաստանում և Հայաստանում, որպեսզի մասնակցի ժողովրդավարական կառավարման, կոռուպցիայի դեմ պայքարի, ԶԼՄ-ների և խոսքի ազատություն, մարգինալացված ու խոցելի խմբերի վերաբերյալ նախատեսված քննարկումներին։

Հայաստանում պետքարտուղարի տեղակալ Զեյան կհանդիպի բարձրաստիճան պետական պաշտոնյաների և քաղաքացիական հասարակության ներկայացուցիչների հետ՝ ԱՄՆ-Հայաստան գործընկերության ամրապնդման, օրենքի գերակայության, հակակոռուպցիոն և դատաիրավական բարեփոխումների ոլորտում Հայաստանի առաջխաղացման վերաբերյալ հարցերը քննարկելու համար:

Նա կայցելի Հայոց ցեղասպանության հուշահամալիր՝ հարգանքի տուրք մատուցելու 1915 թվականի ցեղասպանության զոհերի հիշատակին։ Բացի այդ, փոխքարտուղարը կայցելի Հաղպատի վանք՝ նպաստելու կրոնական ազատության նկատմամբ հարգանքին և մշակութային պահպանմանը: