Ձեր վստահելի աղբյուրը

 Կիրանցի բնակիչները Ադրբեջանին փոխանցված գույքի փոխհատուցման հարցերով չեն դիմել ՀՀ ՄԻՊ-ին։ կառավարության նիստից հետո լրագրողների հետ զրույցում նշեց ՀՀ ՄԻՊ Անահիտ Մանասյանը։

«Կիրանցի բնակիչներից տների փոխհատուցման չափով բողոքներ չենք ստացել, բայց նախքան բնակիչների կողմից դիմում ներկայացնելը ես ինքս ոչ միայն Կիրանց, այլև տարբեր սահմանամերձ բնակավայրեր մեկնել եմ, կոնկրետ Տավուշի մարզի սահմանամերձ բնակավայրերի հետ կապված ես գույքային իրավունքների երաշխավորման հարց անձամբ եմ բարձրացրել»,-  նշեց նա։

Մանասյանն ասաց, որ անհատական դիմում Կիրանցի բնակիչներից չեն ստացել. «Բայց մեր նախաձեռնությամբ ենք այդ խնդրով զբաղվել։ Ես ինքս բարձրացրել եմ այն հարցը, որ սեփականության իրավունքի հետ կապված  քաղաքացիները միանշանակ պետք է ոչ միայն ստանան փոխհատուցում, երբ ունեն  սեփականության իրավունքի վկայական, ես ավելի առաջ եմ շարժվել այդ առումով և նշել եմ, որ եթե նույնիսկ անձինք չունեն սեփականության իրավունքի վկայական, բայց ունեն գույքային իրավունքներ, որոնք պետության պարտավորության ներքո են գտնվում, միանշանակ է, որ պետությունը պետք է փոխհատուցման խնդիրը հասցեավորի պատշաճ եղանակով»։