Ձեր վստահելի աղբյուրը

«Երևանը խեղվում է։ Դա նկատում է նաև ասպարեզից հեռու քաղաքացին»,- Panorama.am-ի հետ զրույցում ասաց ՀՀ վաստակավոր նկարիչ Հաղթանակ Շահումյանը, ով 1977-1989 թվականներին եղել է Երևանի գլխավոր նկարիչը։

Նա նշեց, որ իր աչքի առաջ Զանգվի ձորն ամբողջովին կառուցապատվել է. այն ձորը, որը Երևանի թոքերն էր, փրկությունը։

«1960-ականներին Ակադեմիան արգելեց կապիտալ շինարարությունը այդտեղ, որովհետև հնէաբանական շուրջ 12 հազար տարվա բնակատեղին տեսել էին, բայց դեռ ուսումնասիրված չէր։ Արգելեցին ընդհանրապես կապիտալ շինարարությունը, հիմա աջ ու ձախ կառուցում են, ինչը ցավալի է։ Էլ չեմ ասում կենտրոնը, հրապարակի շուրջ բարձրահարկ շենքեր են, ինչն արգելված էր։ Քաղաքի կենտրոնում միակ 7 հարկանի շենքեր պետք է լիներ»,- ասաց Շահումյանը։

Հարցին՝ մասնագետների պակաս կա՞, թե՞ ժամանակն է թելադրում, որ Երևանը նման կառուցապատում ունենա, նա ասաց. «Ոչ թե պակաս է, այլ մասնագետները ինչ-որ բաների են տեղիք տալիս, որոշ մարդկանց թելադրանքների։ Մեր քաղաքաշինական խորհրդուրդներում որևէ ղեկավար քիթը չէր խոթի ու որևէ միջամտություն չէր ցուցաբերի, ինչ որոշեր քաղաքաշինական խորհուրդը և Ճարտարապետների միությունը, դա օրենք էր անգամ ամենաբարձր ղեկավարի համար»։

Մանրամասն՝ տեսանյութում։