![](https://panorama.am/news_images/1011/3031503_1/f62d66f1d2698a_62d66f1d269ca_thumb_v1_thumb_v1.thumb.jpg)
Ատելության հողի վրա 2-րդ հարձակումն է եղել Երուսաղեմում գործող հայկական բիզնեսի վրա. Պատգամավորի ահազանգը
«Վերջին մեկ շաբաթվա ընթացքում ատելության հողի վրա 2-րդ հարձակումն է եղել Երուսաղեմում գործող հայկական բիզնեսի վրա: Ծայրահեղականը պղպեղի հեղուկ է ցողել հայկական պանդոկի մուտքից ներս, տուժել են պանդոկի այցելուները: Մի քանի օր առաջ երկու այլ ծայրահեղականներ ներխուժել էին նույն պանդոկ, ահաբեկել այցելուներին, վնասել գույքը»,-ահազանգում է ԱԺ «Հայաստան» խմբակցության պատգամավոր Քրիստինե Վարդանյանը։
Նա ընդգծում է՝ Երուսաղեմում կրոնական և ազգային հողի վրա հայերի վրա հարձակումները վերջին տարիներին դարձել են պարբերական, գնալով ավելի հանդուգն ու ագրեսիվ:
«Բացի անհատական հարձակումներից, արդեն մի քանի տարի է, ինչ շարունակվում են հայապատկան հողերը և բացառիկ նշանակության ժառանգությունը խլելու նպատակով իրականացվող կազմակերպված բնույթի հարձակումները, որոնք մի քանի անգամ վերածվել են ծայրահեղականների ու ժառանգությունը պաշտպանող հայերի միջև բախումների:
Այս ամենը հասցրել են դատապարտել անգամ տարբեր պետությունների բարձրաստիճան պաշտոնյաները, Իսրայելի պետությանը կոչ արել պաշտպանել ազգային և կրոնական փոքրամասնությունների իրավունքները:
Շուրջ 3 տարի ձգվող այս ճգնաժամի մեջ ամենաանհաղորդ կողմը շարունակում են մնալ հայկական պետության ներկայացուցիչները: Այս ողջ ժամանակահատվածում որևէ դատապարտող հայտարարություն, որևէ պաշտոնական արձագանք, որը կօգներ զսպել ծայրահեղականներին, պատժել տարիների ընթացքում տասնյակ հանցագործությունների հեղինակներին չի եղել:
Աշխարհի միակ պետական սուբյեկտը, որն ունի հայերի իրավունքները պաշտպանելու պարտականություն, ոչ միայն ձեռքերը լվացել է այդ գործից, այլ դիրքորոշում է արտահայտում գրեթե բոլոր ճգնաժամային իրավիճակներում, բացի այն դեպքերի, երբ հանցագործությունը ուղղված է սեփական ազգի ներկայացուցիչների դեմ:
Դուք չեք տեսնի ՔՊ-ական պաշտոնյայի հայտարարություն, որը «ցնցվում է» աշխարհի տարբեր հատվածներում հայերի դեմ թշնամական հարձակումներից: Մինչդեռ դա տարբեր կառավարություններին ուղղված հստակ ուղերձ կլիներ առ այն, որ իրենք գործ ունեն մարդկանց հետ, որոնց շահերը պաշտպանող պետություն գոյություն ունի»,-գրում է նա։
Լրահոս
Տեսանյութեր
![Թուրքիան ու Ադրբեջանն այլևս միասնական իրողություն են դրանից բխող բոլոր հետևանքներով. Մելքոնյան](https://panorama.am/video_images/17/50811_1/mela_6760_thumb_v1_thumb_v1_thumb.thumb.jpg)
Թուրքիան ու Ադրբեջանն այլևս միասնական իրողություն են դրանից բխող բոլոր հետևանքներով. Մելքոնյան