Ձեր վստահելի աղբյուրը

ԱՄՆ Սենատի արտաքին հարաբերությունների հանձնաժողովի նիստում այսօր կքննարկվի Վրաստանի հարցը: Այս մասին հայտնում է aliq.ge-ն։

Հայտնի է, որ քննարկումը կմեկնարկի Թբիլիսիի ժամանակով 22:30-ին։ Քննարկումը նախաձեռնել է Վրաստանի բարեկամ սենատոր Ջին Շահինը. նա քաջատեղյակ է Վրաստանի ներքին գործընթացներին։

Սենատորի գրասենյակը հայտարարել է, որ Վրաստանի դեպքում ուշադրության կենտրոնում կլինեն ժողովրդավարության անկումը և վրացի պաշտոնյաների նկատմամբ պատժամիջոցների կիրառումը։ Ակնկալվում է նաև, որ հանրությունը լրացուցիչ տեղեկություն կստանա «Վրաց ժողովրդի ակտի» (MEGOBARI Act -հեղ.) մասին:

«Վրաց ժողովրդի ակտը» ներառում է երկու հիմնական խնդիր.

Պատժամիջոցները պետք է կիրառվեն այն անձանց նկատմամբ, որոնք պատասխանատու են Վրաստանի կայունության, ինքնիշխանության կամ տարածքային ամբողջականության խաթարման համար։ Նաև՝ այն վրացի անձանց նկատմամբ, որոնք պատասխանատու են մարդու իրավունքների խախտումների և կոռուպցիայի համար:

Ընդգծված է ԱՄՆ Սենատի հանձնառությունը՝ աջակցել Վրաստանի քաղաքացիական հասարակությանը վերջին զարգացումների լույսի ներքո։