ՌԴ ԱԳՆ արձագանքել է Բաքվի սպառազինման և փախստականների վերադարձի վերաբերյալ հարցերին
Ռուսաստանը հանդես է գալիս Ադրբեջանի և Հայաստանի միջև բոլոր վիճելի հարցերը բացառապես քաղաքական և դիվանագիտական ճանապարհով լուծելու օգտին։ Այդ մասին ամենշաբաթյա ճեպազրույցում հայտարարել է ՌԴ ԱԳՆ տեղեկատվության և մամուլի դեպարտամենտի փոխտնօրեն Անդրեյ Նաստասինը։
Նրան ուղղված էր հետևյալ հարցը. «Վերջին ճեպազրույցում Մարիա Զախարովան շատ է խոսել Հայաստանի կողմից զենք գնելու մասին։ Կցանկանայի իմանալ ռուսական կողմի կարծիքը 2020 թվականի պատերազմից հետո Ադրբեջանի կողմից զենքի զանգվածային գնման վերաբերյալ, մասնավորապես այնպիսի երկրներից, ինչպիսիք են Թուրքիան, Իսրայելը, Իտալիան, Սերբիան և այլն։ Ավելին, այդ գնումները տեղի են ունենում այն բանի ֆոնին, երբ Ադրբեջանի նախագահ Իլհամ Ալիևը համառորեն Հայաստանի Հանրապետության տարածքն անվանում է «Արևմտյան Ադրբեջան», այսինքն՝ հող նախապատրաստելով Հայաստանի դեմ նոր ագրեսիայի համար»։
«Ուզում եմ ուշադրություն հրավիրել այն գլխավորի վրա, ինչը այժմ կատարվում է Հայաստանի շուրջ և տարածաշրջանում՝ ԱՄՆ-ի և ԵՄ-ի ակտիվ գործողությունները՝ ուղղված Հարավային Կովկասում գոյություն ունեցող կապերի ոչնչացմանը։
Արևմուտքը ցանկանում է ապակայունացնել տարածաշրջանը, այն վերածել լարվածության հերթական օջախի կամ նույնիսկ Ռուսաստանի սահմանների մոտ երկրորդ ճակատի: Դրա համար նրանք փորձում են ներթափանցել տարածաշրջանային գործընկերների հետ մեր բազմակողմ հարաբերությունների բոլոր ոլորտները՝ հատուկ ուշադրություն դարձնելով անվտանգությանը։ Մենք բազմիցս խոսել ենք Հայաստանում ԵՄ հետախուզական առաքելության մասին։
Ռուսաստանը հանդես է գալիս Ադրբեջանի և Հայաստանի միջև բոլոր վիճելի հարցերը բացառապես քաղաքական և դիվանագիտական ճանապարհով լուծելու օգտին։ Էսկալացիայից խուսափելու համար մենք կոչ ենք անում Բաքվին և Երևանին ցուցաբերել զգուշություն, խուսափել ռազմատենչ հռետորաբանությունից և ջանքերը կենտրոնացնել փոխընդունելի լուծումներ գտնելու վրա, որոնք կնպաստեն Հարավային Կովկասի տարածաշրջանում կայուն խաղաղության և բարգավաճման արագ ձեռքբերմանը:
Ինչպես արդեն նշեցի, դրա միակ ճանապարհային քարտեզը Ռուսաստանի, Ադրբեջանի և Հայաստանի ղեկավարների միջև եռակողմ պայմանավորվածությունների իրականացումն է»,-ասել է Նաստասինը։
Նաստասինը նաև մեկնաբանել է Ադրբեջանի նախագահ Իլհամ Ալիևի՝ ադրբեջանցիներին Հայաստան վերադարձնելու պահանջի և այն «Արևմտյան Ադրբեջան» անվանելու մսդին։ Բայց միևնույն ժամանակ, ինչպես հիշեց լրագրողը, ոչինչ չի ասվում ոչ միայն Բաքու, Կիրովաբադ և ադրբեջանական այլ քաղաքներ, այլև Արցախ հայ փախստականների վերադարձի մասին։
«Քանի որ հայ-ադրբեջանական հակամարտությունը ձգձգվում է, երկարատև դիմակայության ընթացքում երկու կողմից էլ հազարավոր փախստականներ և տեղահանվածներ կային։ Ռուսաստանը հետևողականորեն հանդես է գալիս Բաքվի և Երևանի միջև ամուր, կայուն խաղաղության հաստատման օգտին։
Հենց դրան է ուղղված ամենաբարձր մակարդակով եռակողմ պայմանավորվածությունների համալիրը, որը ես նշեցի ձեր առաջին հարցին պատասխանելիս։ Դրանք նախատեսում են ամենաբարդ խնդիրների փուլային լուծում, այդ թվում՝ սոցիալական և հումանիտար բնույթի, և երկխոսության մեկնարկ երկու երկրների քաղաքացիական հասարակության ներկայացուցիչների միջև։ Խոսքը ոչ միայն փախստականների, այլև հուշարձանների պատերազմի շարունակությունը կանխելու մասին է։ Այս թեման բազմիցս շոշափվել է նաև նախորդ ճեպազրույցների ժամանակ»,-ասել է Նաստասինը։
Հարակից հրապարակումներ`
Լրահոս
Տեսանյութեր
Թշնամnւ հրահանգները մեր կյանք տեղափոխողները Հայաստանի թշնամիներն են. Բագրատ Սրբազան
