Ձեր վստահելի աղբյուրը

Կառավարության վերջին նիստում որոշում ընդունվեց Տարածքային կառավարման և ենթակառուցվածքների նախարարության ենթակայության տակ ստեղծել «Ատոմային նոր էներգաբլոկի կառուցում» փակ բաժնետիրական ընկերությունը, որ զբաղվելու է բացառապես ատոմային նոր ատոմակայանի կառուցման աշխատանքներով։ Արդյոք Հայաստանին պետք է նոր ատոմային էներգաբլոկ, ինչ հզորության պետք է այն լինի։ Վերոնշյալ հարցերի շուրջ «Panorama-հարցազրույց»-ի տաղավարում իր կարծիքն է հայտնել էներգետիկ փորձագետ, Հայաստանի էներգետիկայի նախարարի նախկին տեղակալ Էդվարդ Արզումանյանը։

Հարցազրույցում հնչեցված հիմնական թեզերի մի մասը՝ ստորև.

▪Հիմա խոսել նոր ատոմային բլոկի կառուցման մասին և այդ խոսույթի հիման վրա կառավարությունում որոշում  ընդունել ստեղծել նոր կառույց, որը պետք է ինքը զբաղվի բոլոր հարցերով, որը վերաբերում է նոր միջուկային բլոկին, միանգամայն սխալ է։ Դեռ շատ-շատ շուտ է մտածել նոր բլոկի կառուցման մասին, որովհետև դեռ կան այնքան պրոբլեմներ, հարցեր, որոնք պետք է քննարկվեն, լուծվեն , որ մտածես կլինի, թե ոչ։

▪Եթե դու ցանկանում ես նոր ատոմային բլոկը կառուցել գործող բլոկի հարևանությամբ և այլն, գուցե օգտագործես գործողի ենթակառուցվածքները։ Այդ հարցով եթե նույնիսկ ուզում ենք հիմա զբաղվել, ապա իմ կարծիքով դրանով պետք է զբաղվեն միայն գործող ատոմակայանի ղեկավարությունը, եթե պետք է այնտեղ 10-15 հոգանոց նոր բաժին բացելով։

▪Մենք ունենք Ատոմային էներգիայի անվտանգության գիտահետազոտական ինստիտուտ, ունենք Ատոմային էներգիայի անվտանգության պետական կոմիտե, այս բոլորն ունենալու հետ միասին մի 50 մետրի վրա ստեղծում ես նոր դիրեկցիա՞։ Այնպիսի մարդիկ, որոնք իրավունք կունենան այդ դիրեկցիայում աշխատել տնօրեն, տեղակալ, նման մարդիկ ես չեմ տեսնում՝ բացի նրանցից, որոնք այսօր աշխատում են գործող ատոմակայանում։ Բա էլ ո՞ւմ ես դնելու, ով է ղեկավարելու, էդ մեր նախարարությո՞ւնը, որ մինչև հիմա սխալ է ղեկավարում, սխալ մտքերով, սխալ որոշումներ է ընդունում։ Արդեն քանի տարի է զբաղվում եք նոր ատոմային բլոկով ու 0-ի վրա եք, առաջ չեք գնացել։ Նույնն այստեղ կշարունակվի։

▪Այն դիտարկումները, որ մենք այսօր պետք է զբաղվեք որպեսզի Հայաստանում ունենանք այնպիսի ատոմակայան, որը մեր սեփական կարիքները բավարարելուց բացի ունենա նաև էլեկտրևաէներևգիան արտահանելու հնարավորություն, դրանք միանգամայն սխալ, Էներգետիկ տեսակետից  տգետ մտքեր են, որոնց մասին ես վաղուց ասել եմ։

▪Մենք 21-րդ դարում ենք և հիմա բոլորովին այլ աշխարահայացք է այլ մտքեր են և բոլորովին ուրիշ կարողություններ և հարցադրումներ կան։ Ատոմային կայանը ջերմային բլոկը կամ հիդրոագրեգատները չեն։ Ատոմային էներգիայի անվտանգության միջազգային գործակալությունը՝ ՄԱԳԱՏԵ-ն ունի իր հաստատված ընդունված օրենքները և այդ օրենքները պահանջում են, որ մենք մեր ատոմակայանը կառուցելիս չխախտենք կանոններ և նոր ատոմակայանի կառուցման ժամանակ լրիվ հաշվի առնենք այդ բոլոր անվտանգային կանոնները։

▪Հայաստանն աշխարհի երկրներից առայժմ միակն է, որն ունենալով շատ փոքր տարածք՝ ընդամենը 29 հազար ք/կմ, ունի ատոմակայան։ Չէ որ ատոմակայանը պահանջում է, որ իր տարածքից դուրս ունենա անբնակելի տարածություններ՝ ատոմային անվտանգության պահանջները բավարարելու համար։ Այդ պահանջները ներկայում մեր ատոմակայանի մոտ հազիվ կարելի է ասել, որ մի քիչ բավարարում են, որովհետև երկիրը աճում է, նաև բնակչության թիվը։

Հարցազրույցն ամբողջությամբ՝ կից տեսանյութում։