Ձեր վստահելի աղբյուրը

Սանկտ Պետերբերուգում հինգ տարեկան աղջիկն ընկել է չորրորդ հարկի բնակարանի պատաւոհանից։ Ռուսական ԶԼՄ-ների փոխանցմամբ, նա գտնվում է  վերակենդանացման բաժանմունքում։

Դեպքի պահին երեխան բնակարանում եղել է հորաքրոջ հետ։ Երբ երեխան դուրս է մնացել ուշադրությունից, բարձրացել է պատուհանի գոգին ու ընկել պատուհանից՝ հայտնվելով ասֆալտի վրա։

Դեպքի վայր ժամանած բժիշկները աղջկան տարել են հիվանդանոց։ Նրա մոտ ախտորոշվել են գլխի բաց վնասվածք, գանգի կոտրվածք, գլխուղեղի այտուց և այլ վնասվածքներ։ Տուժածի վիճակը գնահատվում է ծայրահեղ ծանր։

Ավելի վաղ Հայաստանի ԱՆ-ն հայտնել էր, որ բարձրությունից ընկնելը հոսպիտալացումների հիմնական պատճառն է մինչև 5 տարեկանների շրջանում:

Նախարարությունը  երեխայի անվտանգությունն ապահովելու համար խորհուրդ էր տվել.

• Պահե՛ք պատուհանները փակ և կողպած, երբ երեխաները տարածքում են: Օդափոխության համար հնարավորության դեպքում բացե՛ք այն պատուհանները, որոնք անհասանելի են երեխաներին:
• Պատուհանների համար նախատեսված ցանցերը չեն կարող կանխել երեխայի վայր ընկնելը. թու՛յլ մի տվեք` երեխան հենվի պատուհանի ցանցին և մի՛ վստահեք որպես պաշտպանիչ շերտ:
• Կահույքը կամ այն ամենը, ինչի վրա կարող է բարձրանալ երեխան, դրե՛ք պատուհաններից հեռու:
• Կազմակերպե՛ք երեխայի հանգիստը և խաղալու համար նախատեսված տարածքը բաց պատուհանից կամ պատշգամբից առավելագույնս հեռու:
• Ոչ մի դեպքում չի կարելի թուլացնել ուշադրությունը երեխայի հանդեպ, առավել ևս, երեխային մենակ, առանց հսկողության մի՛ թողեք սենյակում:
• Հիշե΄ք, որ արգելապատնեշները չեն կարող փոխարինել երեխաների նկատմամբ ծնողի հսկողությանը: