Ձեր վստահելի աղբյուրը

Բնակչության թվի աճմանը և բնական միջավայրի դեգրադացմանը զուգընթաց դժվարանում է բոլորի համար անվտանգ և բավարար ջրամատակարարման ապահովումը:

«Հիդրոօդերևութաբանության և մոնիթորինգի կենտրոն» ՊՈԱԿ-ի պատրաստած հրապարակման համաձայն, խնդրի հիմնական լուծումը հնարավորինս քիչ աղտոտելն ու կեղտաջրերի կառավումը բարելավելն է:

Շրջանաձև ու կայուն տնտեսություն ունենալու համար հարկավոր է նվազեցնել էկոհամակարգերի աղտոտվածությունը և ավելացնել կեղտաջրերի մաքրումը, վերամշակումը և անվտանգ վերաօգտագործումը՝ որպես ջրի, էներգիայի և սննդանյութերի աղբյուր:

Արդյունաբերությունն ու գյուղատնտեսությունը հաճախ համարվում են ջրի խոշոր աղտոտողներ: Ոռոգման ժամանակ քիմիական պարարտանյութերի, թունաքիմիկատների օգտագործման աճը աղտոտում են ստորերկրյա և մակերևութային ջրային ռեսուրսները:

Շատ տարածքներում արդյունաբերական արտահոսքերը լցվում են անմիջապես ջրային ռեսուրսներ:
Քաղաքներում չմաքրված կեղտաջրերը լուրջ խնդիր են հանդիսանում: Ավելի աղքատ քաղաքային շրջաններում կեղտաջրերի մեծ մասը առանց մաքրման թափվում է անմիջապես ամենամոտ դրենաժային համակարգ կամ ջրային ռեսուրս: Կենցաղային կեղտաջրերը, կոմունալ թափոնները, թունավոր քիմիկատները և բժշկական թափոնները աղտոտում են շրջակա միջավայրը՝ խիտ բնակեցված բնակելի գոտիներում:

Անվտանգ կառավարվող կեղտաջրերը էներգիայի, ջրի, սննդանյութերի և այլ վերականգնվող նյութերի մատչելի և կայուն աղբյուր են: Կեղտաջրերը կարող են օգնել բավարարել աճող պահանջարկը: Կան բազմաթիվ մաքրման գործընթացներ և գործառնական համակարգեր, որոնք օգտագործում են կեղտաջրերը քաղաքային գործունեության, կայուն գյուղատնտեսության, էներգիայի արտադրության և արդյունաբերական զարգացման համար:

Առավելությունները զգալիորեն գերազանցում են կեղտաջրերի ավելի լավ կառավարման ծախսերը: Վերամշակման և կեղտաջրերի անվտանգ վերաօգտագործման միջոցով ջրի որակի և մատակարարումների վրա դրական ազդեցությունը կնպաստի հանրային առողջության, շրջակա միջավայրի կայունության և տնտեսական զարգացման առաջընթացին՝ ապահովելով նոր բիզնես հնարավորություններ և ստեղծելով ավելի «կանաչ» աշխատատեղեր:

​