Ձեր վստահելի աղբյուրը

Օգոստոսի 14-ին նախագահ Վահագն Խաչատուրյանը Նիկոլ Փաշինյանի առաջարկով Գուրգեն Արսենյանին նշանակել է ՌԴ-ում Հայաստանի արտակարգ և լիազոր դեսպան: «Հետք»-ը գրում է, որ մինչև անցյալ տարի Արսենյանը Ռուսաստանում բիզնեսի սեփականատեր էր:

«Գուրգեն Արսենյանի հայտարարագրերի ուսումնասիրությունը ցույց է տվել, որ նա ԱԺ ամենահարուստ պատգամավորներից էր:

Ըստ իր վերջին՝ 2023 թ. տարեկան հայտարարագրի՝ Արսենյանը բաժնեմաս ուներ 8 ընկերություններում, որոնցից 7-ը հայկական են, 1-ը՝ ռուսական: Այդուհանդերձ, հայկական ընկերություններից մեկը՝ «Էլդորադո-Արմեն» ՍՊԸ-ն, որտեղ Գ. Արսենյանը 51 % փայ ուներ, 2020-ին սնանկ է ճանաչվել, իսկ 2023-ի տարեվերջին սնանկության գործն ավարտվել է ընկերության լուծարումով: 2023-ի հունիսից չկա նաև միակ ռուսական ընկերությունը՝ «Վկրեդիտ24» ՍՊԸ-ն, սակայն նախկին պատգամավորի 2023 թ. տարեկան հայտարարագրում չի երևում, որ ընկերությունն այլևս գոյություն չունի:

Այլևս նախկին պատգամավորի 2023 թ. տարեկան հայտարարագրից տեղեկանում ենք, որ 2021-ի հունվարին Նյու Յորքի «Nasdaq» բորսայում ձեռք է բերել արժեթուղթ, որի արժեքը 2023-ի տարեվերջին կազմել է 1,9 մլն դոլար, իսկ 2021-ի տարեվերջին 6,1 մլն դոլար էր:

ԱՄՆ-ը, սակայն, Արսենյանի բիզնես հետաքրքրությունների տիրույթում գտնվող միակ օտարերկրյա պետությունը չի եղել: Ինչպես նշեցինք վերևում, նա բիզնես է ունեցել նաև Ռուսաստանում:

Այսպես՝ 1993-ի հունվարին Մոսկվայում հիմնադրվել է «Արս-Թրեյդ» ՍՊԸ-ն (Арс-Трейд), որի տերերը եղել են Գուրգեն Արսենյանը և նրա նախկին կինը՝ Էդիտա Ղարագյոզյանը: Այլևս չգործող ընկերությունը ՌԴ ռեեստրից ջնջվել է 2006-ի օգոստոսին: Ռուսական տեղեկատուներում այս ընկերության մասին բավականին քիչ տվյալներ կան, հայտնի չէ, թե կոնկրետ ինչով է զբաղվել, սակայն անունից կարելի է ենթադրել, որ ներգրավված է եղել առեւտրում:

1994-ի փետրվարին էլ կրկին Մոսկվայում հիմնադրվել է «Նեֆկո» ՓԲԸ-ն (Нефко), որի ղեկավարը եղել է Գ. Արսենյանը: Այս ընկերության մասին ինֆորմացիան ևս սուղ է: Հայտնի է, որ ՌԴ ռեեստրից ջնջվել է 2007-ի մարտին որպես չգործող իրավաբանական անձ:

Վերը հիշատակված «Վկրեդիտ24» ՍՊԸ-ն (Вкредит24) հիմնադրվել է 2014-ի մայիսին Մոսկվայում: Արսենյանն իր հայտարարագրում նշել է, որ ռուսական ընկերությունում 13 % փայ է գնել ընկերության ստեղծման օրը, ինչը տարօրինակ է, քանի որ այդ պարագայում նա սկզբնական հիմնադիր կլիներ: Այդուհանդերձ, ռուսական տեղեկատուների համաձայն՝ ընկերության առաջին հիմնադիրը եղել է Կորյուն Յուրիկի Գրիգորյանը, իսկ 2015-ին սեփականատերեր են դարձել Գ. Արսենյանը (13 %), Միքայել Սերգեյի Բադալյանը (34 %) և օֆշորային Բրիտանական Վիրջինյան Կղզիներում գրանցված Sync Technologies Ltd.-ն (53 %):

2023-ի հունիսին «Վկրեդիտ24» ՍՊԸ-ն ջնջվել է ՌԴ ռեեստրից, սակայն Գ. Արսենյանը 2023-ի իր տարեկան հայտարարագրում նշել է, որ տարեվերջի դրությամբ եղել է ընկերության 13 %-ի սեփականատեր: Ավելին՝ 2021-ին պատգամավոր դառնալուց առաջ Գ. Արսենյանը 400 հազ. դոլար անտոկոս փոխառություն էր տվել այս ընկերությանը. 2023-ի դեկտեմբերի 31-ի դրությամբ փոխառության չափն անփոփոխ էր: 

Հավելենք, որ այս և հայկական ընկերություններում ունեցած բաժնեմասերը նախկին պատգամավորը 2021-ին 5 տարով հավատարմագրային կառավարման է հանձնել երևանցի Հռիփսիմե Ավետիսյանին»,- գրել է «Հետք»-ը։ 

Նյութն ամբողջությամբ՝ սկզբնաղբյուր կայքում։